पर्यावरण स्नेही होळीचा जागर

पाली, ता. २३ (वार्ताहर) ः जीवनात विविध रंगाबरोबरच नात्‍यांमध्ये गोडवा आणणारा, दुष्ट-वाईट प्रवृत्तीचे निर्मूलन करणारा म्हणून सण म्‍हणजे होळी. हा सण पर्यावरणपूरक साजरा व्हावा, तसेच होळी लहान करा, पोळी दान करा असे आवाहन रायगडमधील अंधश्रद्धा निर्मूलन समितीमार्फत करण्यात आले आहे. दरवर्षी ठिकठिकाणी होळीत नैवेद्य म्हणून जाळल्या जाणाऱ्या हजारो पोळ्या गोरगरिबांना वाटून त्यांची होळी आनंददायी करण्याचा उपक्रम अंनिसकडून राबवण्यात येतो.
जिल्ह्यात अनेक ठिकाणी पर्यावरणस्नेही होळी व धुळवड साजरी होणार आहे. यंदा वन व महसूल विभाग, गाव व शहरातील काही संघटना, निसर्गमित्र, विविध सामाजिक संस्थेच्या माध्यमातून पर्यावरणस्नेही होळी साजरी करण्यासाठी व्यापक प्रमाणात जनजागृती व प्रबोधन करण्यात आले आहे. याबरोबरच अनेक शाळा व महाविद्यालयातही याबाबत मार्गदर्शन करण्यात आले आहे.

होळीला वृक्षलागवडीचा संकल्‍प
होळीला झाडे न तोडण्याचे आवाहन सत्यशोधक वारकरी संप्रदायाचे जिल्हा अध्यक्ष हभप महेश पोंगडे महाराज आणि इतर संस्थानी समाजमाध्यमांवर केले आहे. वृक्षतोड करण्याऐवजी होळीला रोपलागवडीचा संकल्‍प करा, आणि त्‍या रोपाचे संगोपन करा, असे आवाहन पोंगडे यांनी केले आहे. यावर्षीही होळीला ग्रामस्‍थांच्या सहकार्याने गावात वृक्ष लागवडीचा संकल्‍प त्‍यांनी केला आहे.

वसुंधरा हरित ठेवण्याचा प्रयत्‍न
होळी म्हणजे वृक्षतोड या पारंपरिक गैरसमजाला फाटा देत, रोहा तालुक्यातील वांगणी गावातील ग्रामस्थ १२ वर्षांपासून एकही जिवंत व हिरवे झाड न तोडता होळी साजरी करतात. होळीच्या चार-पाच दिवस आधी गावात दवंडी पिटवून होळीसाठी झाडे न तोडण्यासाठी जनजागृती केली जाते. नैसर्गिकरीत्या, वादळामुळे पडलेली, इतर कारणांनी वाळलेली झाडे थोड्या प्रमाणात वापरून प्रतिकात्मक होळी उत्साहात साजरी केली जाते. होळीला झाडे न तोडण्याच्या निर्णयातून वांगणी ग्रामस्थांनी वृक्षसंवर्धनाचा, पर्यावरण रक्षणाचा तसेच वसुंधरा हरित राखण्याचा एक चांगला आदर्श समाजासमोर ठेवला आहे.

‘पोळी वाटणे’ हा उपक्रम कोणीही एखादी गरीब वस्ती निवडून त्यांच्या पातळीवर करू शकतात. मार्गदर्शन मिळविण्यासाठी अंनिसच्या कार्यकर्त्यांना संपर्क करू शकता. बळीराजाच्या अपार कष्टाने मिळवलेले अन्न त्याची मेहनत वाया न जाऊ देता कोणाच्या तरी मुखी लागले पाहिजे. त्याच्या मेहनतीची राख व्हायला नको. पर्यावरण स्नेही रंग वापरून धुळवड व रंगपंचमी साजरी करावी
- विवेक सुभेकर, अध्यक्ष, अंधश्रद्धा निर्मूलन समिती, रायगड शाखा

महाराष्ट्र अंधश्रद्धा निर्मूलन समिती दरवर्षी होळी लहान करा, पोळी दान करा असे आवाहन करते. अनेक हितचिंतक व सामाजिक संघटनाही उपक्रमात सहभागी होत आहेत. पाली, पेण, नागोठणे, खोपोली, अलिबाग, रोहा आदी ठिकाणच्या अंनिस शाखा तसेच जिल्ह्यातील इतरही मंडळे हजारो पोळ्या जमा करून त्याचे आदिवासी वाड्यांवर वाटप करणार आहेत.
- संदेश गायकवाड, राज्‍य पदाधिकारी, अंधश्रद्धा निर्मूलन समिती