विद्यार्थ्यांनी नोकरी देणारे उद्योजक व्‍हावे

विद्यार्थ्यांनी नोकरी देणारे उद्योजक व्‍हावे
विद्यार्थी चर्चासत्रात प्रा. डॉ. कारभारी काळे यांचे प्रतिपादन
सकाळ वृत्तसेवा
अलिबाग, ता. २ : मनुष्य केवळ पदवीनेच पूर्ण होत नसतो. नोकरी मागणारे नव्हे तर नोकरी देणारे बना, असा सल्ला डॉ. बाबासाहेब आंबेडकर तंत्रशास्त्र विद्यापीठाचे कुलगुरू प्रा. डॉ. कारभारी काळे यांनी विद्यार्थ्यांना दिला. डॉ. बाबासाहेब आंबेडकर तंत्रशास्त्र विद्यापीठ फोरम ऑफ इनोव्हेशन, इनक्युबेशन अँड एंटरप्राइझ, लोणेरे व पदविका विभाग डॉ. बाबासाहेब आंबेडकर तंत्रशास्त्र विद्यापीठ यांच्या संयुक्त विद्यमाने आयोजित उद्योजक-विद्यार्थी चर्चासत्रात संबोधित करताना ते बोलत होते. विद्यार्थ्यांनी आपले आचार-विचार, नितीमत्ता, कार्यक्षमता आणि आपले उद्दिष्ट यावर लक्ष केंद्रित करून आपला सर्वांगीण विकास साधला पाहिजे, असेही मत त्यांनी मांडले.
आपल्या परिसरातील सामाजिक, राजनैतिक, औद्योगिक आणि शैक्षणिक अडचणी समजून त्यावर नावीन्यपूर्ण उत्पादने तयार करून उद्योजकीय प्रवासात सहभागी होण्याचे आवाहन यावेळी त्‍यांनी केले. चर्चासत्रात प्रोमंत्रा प्रोजेक्ट प्रायव्हेट लिमिटेडचे मुख्य कार्यकारी अधिकारी विराज पाटील, प्रमुख पाहुणे आणि यशस्वी उद्योजक यांनी विद्यार्थ्यांना त्यांच्या उद्योगाची यशोगाथा सांगितली. तसेच जास्तीत जास्त विद्यार्थ्यांनी उद्योग क्षेत्रात आपले करियर करावे, असे आवाहन केले. आपल्या आजूबाजूला अनेक उद्योग संधी उपलब्ध असून उघड्या डोळ्यांनी ते पाहण्याची गरज असल्याचे मत त्यांनी व्यक्त केले. पदविका विभागाचे प्राचार्य डॉ. मधुकर दाभाडे यांनी चर्चासत्राची पार्श्वभूमी सांगून कार्यक्रमाची सुरुवात केली. इनक्युबेशन सेंटरचे संचालक डॉ. संजय नलबलवार यांनी उत्तम विद्यार्थी घडविण्याच्या दृष्टीने विद्यापीठामार्फत सुरू करण्यात आलेल्या विविध नवीन उपक्रमांबद्दल माहिती दिली. या कार्यक्रमात १५० पेक्षा अधिक विद्यार्थ्यांनी सहभाग दर्शविला. कार्यशाळेच्या यशस्वी आयोजनासाठी इनक्युबेशन सेंटर व डॉ. बाबासाहेब आंबेडकर तंत्रशास्त्र विद्यापीठाच्या अधिकारी, कर्मचारी व उद्योजकता विकास कक्षाच्या समन्वयकांनी अथक प्रयत्न केले.