हुकमी भात पीक अवकाळी पावसाने हिरावले उन्हाळी भात शेतीचे नुकसान शेतकरी हवालदिल नुकसान भरपाईची मागणी

भातपीक अवकाळी पावसाने हिरावला
उन्हाळी भातशेतीचे नुकसान ः शेतकरी हवालदिल, नुकसानभरपाईची मागणी
अमित गवळेः सकाळ वृत्तसेवा
पाली, ता. १२ (वार्ताहर) ः माणगाव व रोहा परिसरात काही ठिकाणी कालव्याच्या पाण्यावर उन्हाळी भातशेती केली जाते. हमखास पाणी, पोषक वातावरण, शेतीची योग्य मशागत आणि हवामानाची साथ यामुळे उन्हाळी भातशेतीमधून शेतकऱ्यांना हुकमी पीक व उत्पन्न मिळते, मात्र अवकाळी पावसामुळे हे पीक पाण्याखाली गेल्याने नुकसान झाले असून, शेतकरी हवालदिल झाला आहे. येथील शेतकऱ्यांनी नुकसानभरपाईची मागणी केली आहे.
काही दिवसांपूर्वी शेतकऱ्यांची उन्हाळी भातशेतीच्या कामांची लगबग सुरू होती. टपोऱ्या भाताच्या लोंब्या डोलू लागल्या होत्या. त्यामुळे हाती भरघोस पीक लागणार यामुळे शेतकरी सुखावले होते. अनेकांनी शनिवार (ता. १०) नंतर भातकापणीचे नियोजनसुद्धा केले होते, मात्र अवकाळी पावसाने घात केला. त्यामुळे मोठ्या प्रमाणात भातपिकाचे नुकसान झाले आहे. शेतामध्ये पाणी साठले आहे. नाइलाजाने भिजलेला भात शेतकऱ्यांना कापावा लागत आहे. या भाताला भावदेखील मिळणार नाही. तसेच पेंढा भिजल्याने पेंढ्यालादेखील भाव मिळणार नाही. यामुळे शेतकरी अतिशय चिंतेत आहेत.
मोठ्या प्रमाणात अवकाळी पाऊस पडल्याने शेतामध्ये पूर्णपणे पाणी साठले. भात पूर्णपणे भिजला आहे. हाती आलेले भातपीक पूर्णपणे भिजले आहे. त्यामुळे ते खराब झाले आहे. त्याला भावदेखील मिळणार नाही. तब्बल २५ ते ३० हजारांचे नुकसान झाले आहे. शासनाने याची दखल घेऊन ताबडतोब पंचनामा करावा व नुकसानभरपाई द्यावी, अशी विनंती आहे.
- चंद्रकांत यशवंत येळकर, शेतकरी, ता. रोहा

हुकमी पीक
हमखास पाणी, पोषक वातावरण, शेतीची योग्य मशागत आणि हवामानाची साथ यामुळे उन्हाळी भातशेतीमधून शेतकऱ्यांना हुकमी पीक मिळते. पावसाळ्यातील शेतीतून मिळणाऱ्या उत्पादन व उत्पन्नापेक्षा उन्हाळी शेतीतून अधिक चांगले उत्पादन व उत्पन्न मिळते. त्यामुळे शेतकरी समाधानी असतात. काही शेतकरी तर पावसाळ्याऐवजी उन्हाळी शेती करण्यास प्राधान्य देतात, मात्र यंदा अवकाळी पावसाने उन्हाळी भातशेतीचे मोठे नुकसान केले.