आपदा मित्रांना सक्षम करा

‘आपदा मित्रांना सक्षम करा’
महिला व बालविकास मंत्री आदिती तटकरेंच्या जिल्हा प्रशासनाला सूचना; आपत्कालीन तयारीचा घेतला आढावा

अलिबाग, ता. २६ : रायगड जिल्ह्यात मॉन्सून सक्रिय होत असताना यादरम्यान अतिवृष्टी, पूर, दरडी कोसळणे यारख्या नैसर्गिक आपत्ती निर्माण होण्याची जास्त शक्यता आहे. अशा परिस्थितीत शासकीय यंत्रणेला मोलाचे सहकार्य करणाऱ्या ‘आपदा मित्र’ हे आपत्कालीन परिस्थितीत मदत करण्यासाठी अत्यंत महत्त्वाचे आहेत. त्यांना अधिक सक्षम व प्रभावी बनवण्यासाठी आवश्यक ती सर्व संसाधने, मदत जिल्हा प्रशासनाने उपलब्ध करून द्यावी, असे निर्देश महिला व बालविकास मंत्री आदिती तटकरे यांनी दिले.
जिल्हाधिकारी कार्यालयात रायगड जिल्ह्यातील आपदा मित्रांची बैठक महिला व बालविकास मंत्री यांच्या अध्यक्षतेखाली सोमवार (ता. २६) घेण्यात आली. या वेळी त्या बोलत होत्या. या बैठकीला जिल्हाधिकारी किशन जावळे, पोलिस अधीक्षक आंचल दलाल, उपवनसंरक्षक राहुल पाटील, निवासी उपजिल्हाधिकारी संदेश शिर्के, जिल्हा आपत्ती व्यवस्थापन अधिकारी सागर पाठक यांसह विविध आपदा मित्र संस्थेचे प्रतिनिधी उपस्थित होते. या वेळी त्यांनी आपत्कालीन परिस्थितीच्या सज्जतेचाही आढावा घेतला.
महापूर, दरड दुर्घटना, आग, रस्ते अपघात अथवा कोणतीही नैसर्गिक आपत्ती असो या घटनांमध्ये सर्वसामान्यांचा जीव वाचविण्याचं काम आपत्ती व्यवस्थापनातील आपदा मित्र करत आहेत. बोटी चालवणे, तराबा हाकणं, दरीतील मृतदेह बाहेर काढणं, रस्ते अपघातातील जखमींना तत्काळ प्राथमिक आरोग्य सुविधा उपलब्ध करून देणं, यासह आपत्ती काळात कराव्या लागणाऱ्या अनेक मदतीसाठी ते सदैव तत्पर असतात. त्यांना यासाठी लागणारे साहित्य जिल्हा प्रशासनाने त्यांच्या मागणीनुसार उपलब्ध करून द्याव्यात. संबंधित संस्थांनी त्यांची यादी तत्काळ जिल्हा प्रशासनास पाठवावी, अशा सूचना तटकरे यांनी या वेळी दिल्या.
आपत्ती ठिकाणी पोहोचण्यासाठी या संस्थांना वाहन तसेच आवश्यक सुविधा देण्यात याव्यात. जे आपदा मित्र नोकरी किंवा कामावर जात असतील, तर त्यांचा हा सेवाकालावधी विनावेतन होणार नाही. यासाठी संबंधित आस्थापनांना आपत्ती व्यवस्थापन कायद्याअंतर्गत तरतुदीनुसार कळविण्यात येईल, असेही तटकरे यांनी सांगितले. या वेळी अपघातग्रस्तांच्या मदतीसाठी सामाजिक संस्था खोपोली, साळुंखे रेस्कू टीम, सानप रेस्कू टीम, सिसकेप रेस्कू टीमचे प्रतिनिधी  उपस्थित  होते.