फुलशेती, बांबू लागवडीसाठी करा अर्ज

पाली, ता. १२ (वार्ताहर) : सुधागड तालुक्यातील शेतकऱ्यांसाठी महात्मा गांधी राष्ट्रीय ग्रामीण रोजगार हमी (नरेगा) योजनेअंतर्गत फळबाग लागवड, फुलशेती आणि बांबू लागवडीसाठी शंभर टक्के अनुदान उपलब्ध आहे. त्यामुळे शेतकऱ्यांनी अर्ज करावा, असे आवाहन सुधागड कृषी विभागाने केले आहे.
कृषी विभागामार्फत आंबा, काजू, नारळ, सुपारीसह विविध फळलागवड; मिरी, लवंग, जायफळ, दालचिनी यासारख्या मसाले; मोगरा, गुलाब, सोनचाफा यांसारख्या फुलपिकांची; तर बांबू, हादगा, जेट्रोफा, साग, चंदन, गिरिपुष्प, शिंदी यासारख्या वनपिकांची लागवड करता येते. कोकण विभागातील रायगड जिल्ह्यातील सुधागड तालुक्यातील हवामान फळबाग आणि बांबू लागवडीसाठी अत्यंत अनुकूल आहे. शेतीमधून शाश्वत उत्पादन मिळविण्यासाठी शेतकऱ्यांनी फळबाग लागवडीकडे वळणे आवश्यक आहे. जून महिन्यात लागवड केलेल्या कलमांची वाढ जोमदार होते. शेतकऱ्यांनी याच महिन्यात फळपिके, फुलशेती आणि बांबूची लागवड करण्याचा प्रयत्न करावा.
----------------
तीन टप्प्यात अनुदान
नरेगाअंतर्गत पाच गुंठे ते दोन हेक्टर क्षेत्रापर्यंत फळबाग लागवड करता येते. पहिल्या वर्षी ६० टक्के, दुसऱ्या आणि तिसऱ्या वर्षी प्रत्येकी २० टक्के याप्रमाणे अनुदान वितरित केले जाते. या योजनेचा लाभ घेऊ इच्छिणाऱ्या शेतकऱ्यांनी ग्रामस्तरीय सहाय्यक कृषी अधिकारी यांच्याकडे अर्ज सादर करावा. अधिक माहितीसाठी सहाय्यक कृषी अधिकारी, मंडल कृषी अधिकारी किंवा तालुका कृषी अधिकारी कार्यालयाशी संपर्क साधावा.
---------------
कोण लाभ घेऊ शकतो?
- अल्पभूधारक शेतकरी (दोन हेक्टर किंवा त्यापेक्षा कमी जमीन असलेले).
- अनुसूचित जाती आणि अनुसूचित जमाती प्रवर्गातील शेतकऱ्यांना जमीनधारणेची अट नाही.
- लाभ घेऊ इच्छिणाऱ्या शेतकऱ्यांकडे नरेगाचे जॉब कार्ड असणे आवश्यक आहे.
----------------
अर्जासाठी आवश्यक कागदपत्रे
- ७/१२ उतारा
- ८ अ उतारा
- आधार कार्ड
- बँक पासबुक
- जॉब कार्ड
- संमतीपत्र
- ग्रामसभा ठराव