सरपंचांच्या पतीचा गावकारभारात हस्‍तक्षेप

पाली, ता. ८ (वार्ताहर) ः स्थानिक स्वराज्य संस्थामध्ये महिलांना पन्नास टक्के आरक्षण मिळाले; मात्र निवडून आलेल्या महिलांच्या जागी त्यांचे पतीच कारभार हाताळताना दिसतात. सुधागड तालुक्यातील पाच्छापूर ग्रुप ग्रामपंचायतीमध्ये असाच प्रत्यय आला आहे. सरपंचांचे पती कारभारात हस्तक्षेप करीत असल्‍याची लेखी तक्रार कोकण विभागीय आयुक्त यांच्याकडे एक ग्रामपंचायत सदस्‍य तसेच ग्रामस्थांनी केली आहे. तसेच संबंधित व्हिडिओ व छायाचित्रेही काढली आहेत.
पाच्छापूर ग्रामपंचायतीची निवडणूक पार पाडून ६ नोव्हेंबर २०२३ रोजी सुधारित बदलानुसार थेट नेमणुकीद्वारे उत्कर्षा रोशन बेलोसे सरपंच झाल्या; मात्र त्‍यांचे पती रोशन हे वारंवार ग्रामपंचायतीच्या कामकाजात भाग घेणे, हस्तक्षेप करणे, तसेच ग्रामपंचायत अधिकारी कार्यालयात नसताना सरपंचांच्या खुर्चीवर बसणे, उपसरपंचांच्या खुर्चीवर बसणे, ग्रामपंचायतीचे दफ्तर हातात घेणे व त्याचे फोटो काढणे, झेरॉक्स काढत असल्‍याचे २०२३ मध्ये सदस्‍यांनी केलेल्‍या तक्रार अर्जात नमूद केले आहे.
रोशन हे ग्रामपंचायतीअंतर्गत अनेक निकृष्ट दर्जाची कामे करून बिले काढून ग्रामपंचायतीकडून आर्थिक लाभ घेत असल्‍याचा उल्‍लेख तक्रारीत केला आहे.

पाच्छापूर ग्रामपंचायतीतील प्रकरणात विस्तार अधिकारी यांच्यामार्फत चौकशी करून अहवाल तयार केला जाणार आहे व पुढील कार्यवाहीसाठी अलिबाग वरिष्ठ कार्यालयात पाठवला जाणार आहे.
- लता मोहिते, गटविकास अधिकारी, पाली-सुधागड