रायगडमधील कंत्राटदारांचे तीन हजार कोटी थकीत

पाली, ता. १० (वार्ताहर) ः राज्यातील सर्व विभागांकडील कंत्राटदार, मजूर संस्था, विकसक आदींची विविध विभागाकडील ८९ हजार कोटींची देयके रखडली आहेत. यात रायगडातील तीन हजार कोटींची थकबाकी आहे. ही देयके तातडीने देण्यात यावी, अशी मागणी रायगडचे जिल्हाधिकारी किशन जावळे यांच्याकडे रायगड कंत्राटदार संघटनेच्या वतीने नुकतीच निवेदनाद्वारे करण्यात आली आहे.
सध्या जिल्‍ह्यातील प्रत्‍येक तालुक्‍यात विकासकामे सुरू आहेत. सार्वजनिक बांधकाम विभाग, ग्रामविकास विभाग, नगरविकास, जलसंधारण व जलसंपदा, जलजीवन मिशनअंतर्गत गावागावांत रस्‍ते, पाणी, सुशोभीकरणाची कामे केली जात आहेत; परंतु आठ-दहा महिन्यांपासून विकासकामे पूर्ण झाली असली तरी कंत्राटदाराला देयके मिळालेली नाहीत. जिल्‍ह्यातील जवळपास सर्वच विभागांकडील एकूण ८९ हजार कोटी रुपये इतक्‍या मोठ्या रकमेची देयके प्रलंबित आहेत. त्‍यामुळे पुढील कामे करतानाही अडचणी येतात.
राज्यातील सर्व जिल्हाधिकारी कार्यालयात कंत्राटदार संघटनांच्या वतीने निवेदने सादर करण्यात आली असून तातडीने मार्ग काढावा, अशी मागणी करण्यात आली आहे. जिल्हाधिकारी किसन जावळे यांना निवेदन देताना संघटनेच्या शिष्‍टमंडळातील प्रकाश पालरेचा, कर्जतचे वीरेंद्र जाधव, अलिबाग पिंटू ठाकूर, काका ठाकूर, पेणचे संतोष पाटील, राजेश पाटील, महाडचे तेजस निकम, पालीचे मिलिंद ठोंबरे, विराज मेहता यांच्यासह रायगड जिल्ह्यातील २५० ते ३०० कंत्राटदार उपस्थित होते.

पाली ः कंत्राटदार संघटनेच्या वतीने जिल्हाधिकारी यांना निवेदन देण्यात आले.