अष्टविनायक तीर्थक्षेत्र पाली बसस्थानकाची दुरवस्था

तीर्थक्षेत्र पाली बसस्थानकाची दुरवस्था
सुधागडवासीयांचे परिवहनमंत्र्यांना साकडे; सरनाईकांकडून बसस्थानक नूतनीकरणाचे आश्वासन
अमित गवळे, सकाळ वृत्तसेवा
पाली, ता. १२ (वार्ताहर) ः अष्टविनायक तीर्थक्षेत्रांपैकी एक पाली असल्याने याठिकाणी प्रवाशांची मोठ्या प्रमाणात वर्दळ असते; परंतु पालीच्या बसस्थानकाची मोठी दुरवस्था झाली आहे. स्थानकाला खड्डे, चिखल, दुर्गंधी आदी विविध समस्यांनी वेढले आहे. याबाबत परिवहनमंत्री प्रताप सरनाईक यांना सुधागड तालुका रहिवासी सेवा संघ, ठाणे यांच्या वतीने निवेदन देले असून यावर त्यांनी स्थानकांच्या नूतनीकरणाचे आश्वासन दिले आहे.
महाराष्ट्रातील अष्टविनायकाचे प्रख्यात धार्मिक स्थळ व सुधागड तालुक्यातील मुख्यालयाचे ठिकाण असलेल्या पालीतील बसस्थानकाचे नूतनीकरण मागील पाच वर्षांपासून ठप्प आहे. तसेच स्थानकाला खड्डे, पाणी, चिखल, दुर्गंधी आदी विविध समस्यांनी वेढले आहे. परिणामी, येथील प्रवाशांची प्रचंड गैरसोय होत आहे. तसेच, ठाणे शहरात वास्तव्यास असलेल्या सुधागड पालीवासीयांना एसटी हे एकमेव साधन प्रवासासाठी असल्याने बसफेऱ्यांमध्ये वाढ करण्याची मागणीदेखील सुधागडवासीयांतर्फे करण्यात आली.

बसस्थानक नूतनीकरणाच्या प्रतीक्षेत
पाच वर्षांपूर्वी पाली बसस्थानकाची जुनी धोकादायक इमारत तोडण्यात आली आहे. त्या वेळी स्थानक आवारात तात्पुरत्या स्वरूपाची निवारा शेड बांधण्यात आली; मात्र पाच वर्षे उलटूनही आजतागायत परिवहन महामंडळ अथवा कंत्राटदाराकडून तेथे कोणत्याही स्वरूपाचे काम सुरू करण्यात आलेले नाही. जुन्या इमारतीचे डेब्रिज व राडारोडा स्थानकात तसाच पडला आहे.

पावसाळ्यात स्थानक होते जलमय
स्थानकातील एका बाजूच्या नाल्याचा स्लॅब बांधण्यात आला; मात्र तेथून वाहतूक सुरू नाही. त्यामुळे बस ये-जा करण्यास अडथळा येतो. स्थानक आवारात पालीतील नाले व गटारांतील सांडपाणी येते. पावसाळ्यात बसस्थानकाचा हा परिसर पूर्णपणे जलमय झाल्याने बस वाहतूक ठप्प होते. अशावेळी गाव-पाड्यांमध्ये जाणाऱ्या प्रवाशांची मोठी गैरसोय होते.

सुधागडवासीयांचे परिवहनमंत्र्यांना साकडे
स्थानकाची तातडीने नूतनीकरण करावे, यासाठी प्रताप सरनाईकांना निवेदन दिले. तसेच, ठाणे ते पाली-कोशिंबळे बस नियमित वेळेवर सुरू व्हावी व नवीन बस सायंकाळी साडेचार वाजता वाढविण्याची मागणीही सुधागडवासीयांतर्फे करण्यात आली. प्रताप सरनाईक यांनी तत्काळ पालीसाठी दोन बसफेऱ्या वाढविण्याचे आदेश संबंधित अधिऱ्यांना दिले, तर सरनाईक यांनी अधिकाऱ्यांशी चर्चा करून स्थानकाच्या नूतनीकरणाची कार्यवाही सुरू करण्याचे आश्वासन उपस्थित सुधागडवासीय शिष्टमंडळाला दिले. या वेळी सुधागड तालुका रहिवासी सेवा संघ, ठाणे अध्यक्ष विठ्ठल घाडगे, उपाध्यक्ष वसंत लहाने, संपर्कप्रमुख सुनील तिडके, शाखाप्रमुख अनिल भोईर आदी कोशिंबळे ग्रामस्थ मंडळ ठाणे मुंबई सदस्य आणि सुधागडवासी मोठ्या संख्येने उपस्थित होते.

फोटो ओळ ः
पाली ः प्रताप सरनाईक यांना निवेदन देताना सुधागड तालुका रहिवासी सेवा संघ, ठाणे पदाधिकारी व कार्यकर्ते.