गजेंद्र दळी यांचे निधन

गजेंद्र दळी यांचे निधन
सकाळ वृत्तसेवा
अलिबाग, ता. १० : यशस्वी उद्योजक आणि निष्ठावान समाजसेवक गजेंद्र दळी ऊर्फ गजूभाऊ यांचे नुकतेच वयाच्या ९१व्या वर्षी निधन झाले. त्यांच्या निधनाने अलिबागच्या सामाजिक आणि व्यावसायिक क्षेत्रावर शोककळा पसरली आहे. ब्रह्मा विष्णू महेश सिनेप्लेक्सचे संस्थापक म्हणून ते परिचित होते, तर त्यांचे सामाजिक कार्यही मोठे होते. गजेंद्र दळी यांचे कुटुंब मूळचे रत्नागिरी जिल्ह्यातील लांजाजवळील घाटरोळ गावचे. त्यानंतर त्यांचे वडील पानाचे दुकान चालवण्यासाठी मुंबईत स्थायिक झाले. पुढे हे कुटुंब अलिबागमध्ये आले, जिथे त्यांनी पानाचे आणि विडी बनवण्याचे दुकान सुरू केले. गजेंद्र यांचा जन्म १९ मे १९३४ रोजी अलिबागेत झाला. शिक्षण पूर्ण झाल्यावर गजेंद्र यांना व्यवसायात अधिक रुची निर्माण झाली. यातूनच १९७० रोजी अलिबागमध्ये महेश चित्रमंदिरची स्थापना झाली. सुरुवातीला हे एक ओपन थिएटर होते, जे नंतर कायमस्वरूपी थिएटरमध्ये रूपांतरित झाले आणि आज ते ब्रह्मा विष्णू महेश सिनेप्लेक्स म्हणून अलिबागकरांच्या मनोरंजनाचे एक महत्त्वाचे केंद्र बनले. उत्तम जीवनशैलीचे पुरस्कर्ते असलेले गजेंद्र निर्व्यसनी होते. त्यांच्यामागे त्यांची पत्नी सुधा, दोन पुत्र सत्यजित, विश्वजित आणि सुना, नातवंडे असा मोठा परिवार आहे.