शहापुर-धेरंडला जाडणारा पूल जीर्ण

शहापूर-धेरंड जोडणारा पूल धोकादायक स्थितीत;
दुर्घटनेच्या छायेत प्रवास
अलिबाग, ता. ३० (बातमीदार) : पेझारी-दिवलांग येथून शहापूर आणि धेरंड या गावांना जोडणारा मुख्य पूल सध्या अत्यंत जीर्ण अवस्थेत असून कोणत्याही क्षणी कोसळण्याची शक्यता आहे. या धोकादायक पुलावरून प्रवास करणाऱ्यांना जीव मुठीत धरून प्रवास करावा लागत असल्याने परिसरात भीतीचे वातावरण पसरले आहे.
या पुलावरून शहापूर, मोठे शहापूर, धेरंड तसेच पेझारी गावांना जोडणारा महत्त्वाचा मार्ग जातो. या रस्त्यावर जागृत देवस्थान म्हसोबा आणि ओंकारेश्वर मंदिर असल्याने दररोज भाविकांची व सामान्य प्रवाशांची मोठी वर्दळ असते. तसेच अलिबागमार्गे या भागात जाणारी अवजड वाहनेही याच मार्गाचा वापर करतात. मात्र, सध्या हा पूल पूर्णपणे उघड्यावर असून त्यातील सिमेंट काँक्रीट गळून गेलेले असून गंजलेल्या लोखंडी सळ्या स्पष्टपणे दिसत आहेत. पूल इतका जीर्ण झाला आहे की त्याचे स्ट्रक्चरल ऑडिटही अद्याप झालेले नाही. जुन्या पुलाच्या मजबुतीकरणाकडे स्थानिक प्रशासन आणि लोकप्रतिनिधींचे पूर्णतः दुर्लक्ष होत असल्याची संतप्त भावना नागरिकांमध्ये आहे. हा पूल शेवटची घटका मोजत आहे, तरीही जबाबदार मंडळी निद्रावस्थेत आहेत, असा आरोप नागरिकांकडून केला जात आहे. या पुलाच्या तातडीने दुरुस्तीचा किंवा नव्याने बांधणीचा निर्णय न घेतल्यास लवकरच एखादी मोठी दुर्घटना घडण्याची शक्यता नाकारता येत नाही. त्यामुळे नऊ गाव विस्तारित सामाजिक शेतकरी संघटना, शहापूर यांच्या वतीने तातडीने हस्तक्षेप करून पूल दुरुस्तीचे काम हाती घेण्याची जोरदार मागणी करण्यात आली आहे. स्थानिक प्रशासनाने तातडीने स्ट्रक्चरल ऑडिट करून पूल बंद करून पर्यायी मार्गाची व्यवस्था करावी, अशी मागणी नागरिक व सामाजिक संघटनांकडून एकमुखाने केली जात आहे. अन्यथा संभाव्य दुर्घटनेला प्रशासन जबाबदार ठरेल, असा इशाराही देण्यात आला आहे.