अष्टविनायक तीर्थक्षेत्र पाली शहरात सार्वजनिक स्वच्छतागृहांसाठी अनोखे आंदोलन हातात फलक घेऊन भर पावसात मूक आंदोलन नगरपंचायतला निवेदन

स्वच्छतागृहांसाठी अनोखे आंदोलन
पाली शहरात हातात फलक घेऊन भरपावसात मूक आंदोलन; नगरपंचायतीला निवेदन
पाली, ता. २९ (वार्ताहर) : अष्टविनायकांपैकी प्रसिद्ध तीर्थक्षेत्र व तालुक्याचे ठिकाण असणाऱ्या पाली शहरामध्ये सार्वजनिक स्वच्छतागृहांचा अभाव आहे. या गंभीर प्रश्नाकडे लक्ष वेधण्यासाठी सामाजिक कार्यकर्ते व आयुष्य व्यसनमुक्ती केंद्राचे अध्यक्ष अंकुश आपटे आणि त्यांचे सहकारी यांनी सोमवारी (ता. २८) पालीत अनोखे आंदोलन केले.

हातात फलक घेऊन रस्त्यावर व नाक्यावर उभे राहून भरपावसात मूक आंदोलन केले. तसेच नगरपंचायत मुख्य कार्यकारी अधिकार्यांना यासंदर्भात मागणीचे निवेदन दिले.
सार्वजनिक स्वच्छतागृहांअभावी तालुक्यातील खेडोपाड्यातून पालीत येणाऱ्या शेकडो सर्वसामान्य नागरिकांची, महिला व विद्यार्थ्यांची तसेच भाविकांची नेहमीच कुचंबना होत असते. त्यामुळे पाली नगरपंचायत हद्दीमध्ये स्वच्छतागृह सर्वसामान्य नागरिकांसाठी लवकर उपलब्ध होणे आवश्यक आहे, असे अंकुश आपटे यांचे म्हणणे आहे. पालीकर रहिवाशांनी या मूक जनजागृती आंदोलनाला उत्स्फूर्त प्रतिसाद देऊन अंकुश आपटेंचे कौतुक केले.
या वेळी पाली नगरपंचायत मुख्य कार्यकारी अधिकारी माधुरी मडके, पाली नगरपंचायतीचे प्रभारी नगराध्यक्ष आरिफ माणियार, नगरसेवक पराग मेहता उपस्थित होते. त्यांनी अंकुश आपटे यांनी केलेल्या या मूक जनजागृती आंदोलनाची दखल घेत येत्या वर्षभरात स्वच्छतागृहांची उभारणी करण्यात येईल, असे आश्वासन दिले. तसेच येत्या वर्षभरात नागरिकांसाठी सार्वजनिक स्वच्छतागृहांची उभारणी न केल्यास तीव्र जनआंदोलन छेडण्यात येईल, असा इशारा अंकुश आपटे यांनी प्रशासनाला दिला.

फोटो ओळ ः
पाली ः स्वच्छतागृह उभारणीसाठी हातामध्ये फलक घेऊन रस्त्यावर मूक आंदोलन करताना अंकुश आपटे.