आठ दिवसांत घटस्फोटाचा निर्णय

सकाळ वृत्तसेवा
अलिबाग, ता. ३० : वैचारिक मतभेदामुळे वेगळे राहणाऱ्या दाम्पत्याचा घटस्फोट अवघ्या आठ दिवसांत कौटुंबिक न्यायालयाने मंजूर केला. या प्रकरणातील दोघेही दीड वर्षापासून वेगळे राहात असल्याने हा कालावधी वगळण्यात आला होता.
माधव आणि माधवी (नावे बदललेली आहेत) दोघेही शिक्षित आहेत. जानेवारी २०२४ मध्ये त्यांचा विवाह झाला. या विवाहातून कोणतेही अपत्य नाही. त्यामुळे परस्पर संमतीने दोघेही घटस्फोट घेण्यास तयार झाले होते. याच अनुषंगाने ॲड. विकास कांबळे, ॲड. प्रतिक आरोटे आणि ॲड. दीपिका पांडे यांच्या मार्फत अर्ज दाखल करण्यात आला होता. या निर्णयामुळे वेळेची बचत झाली आहे. दोघेही स्वतंत्रपणे आयुष्य जगण्यास मोकळे झाले आहेत, अशी माहिती वकील ॲड. प्रतीक आरोटे यांनी दिली.
-------------------------------------
सर्वोच्च न्यायालयाच्या निवाड्याचा आधार
सर्वोच्च न्यायालयाच्या निवाड्यानुसार घटस्फोटाचा दावा दाखल करण्यापूर्वी दोघे १८ महिने वेगळे राहात असल्यास सहा महिन्यांचा कालावधी वगळता येतो. त्यामुळे १८ जुलै रोजी दाखल केलेला दावा २५ जुलै रोजी निकाली निघाला.