सशस्त्र दरोड्यातील आरोपी मोकाट

सशस्त्र दरोड्यातील आरोपी मोकाट
फार्महाउसमधील सीसीटीव्हीमध्ये पाच संशयित कैद

पाली, ता. ३ (वार्ताहर) : सुधागड तालुक्यातील हातोंड, गोंदाव आणि माठळ या गावांमध्ये शनिवारी (ता. २६) रात्री पावणेदोन ते रविवारी (ता. २७) पहाटे सव्वातीन वाजताच्या दरम्यान चार ते पाच जणांच्या सशस्त्र टोळीने फिल्मी स्टाइलने धुमाकूळ घालत घरांवर दरोडा टाकला, मात्र आठवडा उलटूनही हे दरोडेखोर अद्यापही मोकाटच आहेत. येथील एका फार्महाउसच्या सीसीटीव्हीमध्ये पाच संशयित दिसले असून, हे संशयित पोलिसांना सापडलेले नाहीत.

आरोपींनी सर्व घरांतील मिळून एक लाख रुपयांचे सोने व जवळपास ६० हजार रुपयांची रोकड व मोबाईल लंपास केले होते. या टोळीने घरातील लोकांच्या गळ्यावर कोयता ठेवत आणि तलवारीचा धाक दाखवत लूटमार केली. या घटनेमुळे ग्रामस्थांमध्ये भीतीचे वातावरण आहे, मात्र यामधील आरोपी अद्यापही फरार आहेत. त्यातच येथील एका फार्महाउसमधील सीसीटीव्ही कॅमेऱ्यामध्ये पाच संशयित कैद झाले असून, पोलिस त्या अनुषंगाने तपास करत आहेत, मात्र या संशयितांचा छडा लावण्यात पोलिसांना यश आले नाही. दरम्यान, या घटनेनंतर गावकऱ्यांनी पोलिस प्रशासनाकडे रात्रीच्या वेळी गस्त वाढवण्याची मागणी केली आहे. ‘गावात रात्री पोलिस गस्त घालत नाहीत, जर नियमित गस्त असती, तर कदाचित ही घटना टाळता आली असती, असे माठळ गावातील रहिवाशांनी सांगितले.

पोलिसांचा तपास सुरू आहे. सीसीटीव्ही फुटेजमध्ये दिसलेल्या संशयितांची कोणाला माहिती असेल, तर त्यांनी पोलिसांना कळवावे. सुधागड तालुक्यात व पाली शहरांमध्ये सीसीटीव्ही कॅमेऱ्याची संख्या कमी आहे. त्यामुळे दरोडेखोर नक्की कोणत्या बाजूला गेले आहेत, हे समजलेले नाही. या प्रकरणाचा तपास सुरू असल्याची माहिती पाली पोलिस ठाण्याच्या पोलिस निरीक्षक हेमलता शेरेकर यांनी दिली.