मुख्यमंत्री सहाय्यता निधीचा जीवनदायी हात

मुख्यमंत्री सहाय्यता निधीचा जीवनदायी हात
२१९ रुग्णांना एक कोटी ९७ लाखांची मदत; रायगडमध्ये उत्स्फूर्त प्रतिसाद
अलिबाग, ता. ४ : गंभीर आजाराने त्रस्त असलेल्या गरजू रुग्णांना तातडीने आर्थिक मदत मिळावी यासाठी जिल्हाधिकारी कार्यालयात स्थापन करण्यात आलेल्या मुख्यमंत्री सहाय्यता निधी कक्षाला अल्पावधीतच मोठा प्रतिसाद मिळत आहे. आतापर्यंत २१९ रुग्णांनी या योजनेचा लाभ घेतला असून, त्यांना एकूण एक कोटी ९७ लाख रुपयांची मदत वितरित करण्यात आली आहे. ही माहिती वैद्यकीय अधिकारी आणि कक्षाचे अध्यक्ष डॉ. विकास पवार यांनी दिली.
मुख्यमंत्री कार्यालयाकडून दुर्धर असलेल्या आजारावरील रुग्णांना उपचारासाठी आर्थिक सहाय्य केले जाते. तसेच आपत्ती प्रसंगीही आर्थिक मदत देण्यात येते. या अनुषंगाचे मदत मिळण्याकरिता मुख्यमंत्री सहाय्यता निधी कक्षामध्ये असंख्य अर्ज येत असतात. जिल्हा स्तरावर याचा निपटारा व्हावा, यासाठी प्रत्येक जिल्हाधिकारी कार्यालयात मुख्यमंत्री सहाय्यता निधी कक्षाची स्थापना १ मे २०२५ रोजी करण्यात आली. त्यानुसार अलिबाग येथील जिल्हाधिकारी कार्यालयातही महिला आणि बालकल्याण मंत्री आदिती तटकरे यांच्या हस्ते कक्षाची स्थापना करण्यात आली. मुख्यमंत्री सहाय्यता निधी कक्षाची जबाबदारी तीन अधिकाऱ्यांकडे देण्यात आलेली आहे. त्यानुसार हे अधिकारी जिल्हाधिकारी कार्यालयातील कक्ष संभाळतात, यामध्ये डॉ. विकास पवार, सहलिपिक तथा सदस्य विठ्ठल शिंदे आणि समाजसेवा अधीक्षक तथा सदस्या हर्षा जाधव आदींचा समावेश आहे.
-----
एक कोटी ९७ लाखांची मदत
मुख्यमंत्री सहाय्यता निधीसह महात्मा फुले जनआरोग्य योजना, आयुष्यमान भारत प्रधानमंत्री जनआरोग्य योजना, धर्मादाय रुग्णालय योजना आदींची देऊन त्यांना आर्थिक सहाय्य मिळवण्यासाठी मदत केली जाते. जिल्हा रुग्णालयातील मुख्यमंत्री सहाय्यता निधीचे एक कोटी ९७ लाख रुपयांचे वाटप झाले आहे. रायगड जिल्ह्यातून मदत मिळणाऱ्यांमध्ये एक २० दिवसांचे बाळ होते. त्याला जन्मताच श्वसनाचा त्रास होता, तर एका ३४ वर्षीय तरुणाला मेंदूचा आजार होता. त्याच्याही ऑपरेशनसाठी मुख्यमंत्री सहाय्यता निधी कक्षामधून मदत देण्यात आली.
-----
संपर्क कुठे करायचा
ज्या गरजूंना मुख्यमंत्री सहाय्यता निधी कक्षामधून मदत हवी असेल, तर त्यांनी ८२६५०००७८९ या क्रमांकावर संपर्क साधण्याचे आवाहन डॉ. विकास पवार यांनी केली आहे. या क्रमांकावर संपर्क केल्यास अथवा व्हॉट्सॲप केल्यास संपूर्ण माहिती मिळते.
---