वाकण पाली खोपोली राज्य महामार्गावर जीवघेणे खड्डे खड्ड्यात आदळून अपघात वाहनांचेही नुकसान प्रवासी व नागरिकांचा संताप

वाकण-पाली-खोपोली राज्य महामार्गावर जीवघेणे खड्डे
खड्ड्यात आदळून अपघात, वाहनांचेही नुकसान
प्रवासी व नागरिकांचा संताप
अमित गवळे : सकाळ वृत्तसेवा
पाली, ता. ५ (वार्ताहर) ः अवघ्या दोन-तीन वर्षांपूर्वी रुंदीकरण पूर्ण झालेल्या वाकण-पाली-खोपोली राज्य महामार्गावर जीवघेणे खड्डे पडले आहेत. या खड्ड्यात आदळून अनेकांचे अपघात होत असून, वाहनांचेही मोठे नुकसान होत आहे. त्यामुळे नागरिकांचा संताप आता अनावर झाला आहे.
वाकण-पाली-खोपोली या राज्य महामार्गाचे काम दोन ते तीन वर्षांपूर्वीच पूर्ण झाले होते. मात्र या मार्गाच्या कामाच्या दर्जाबाबत अनेकांनी प्रश्न उपस्थित केले आहेत. शासनाकडून सुमारे २०० कोटी रुपये खर्चून तयार केलेल्या या मार्गाच्या दुरवस्थेमुळे प्रवासी व नागरिक संतप्त आहेत. या मार्गावरील खड्डे योग्य प्रकारे भरण्यासाठी स्थानिकांनी मागील दोन महिन्यांत दोन वेळा आंदोलन केले. खड्ड्यामंध्ये झाडे लावून तसेच फलक दाखवून हे आंदोलन करण्यात आले. दरम्यान, अद्याप कोणतीच ठोस उपाययोजना करण्यात आलेली नाही.
या मार्गावर देवन्हावे, मिरकूटवाडी, इमॅजिका, उंबरे, गोंदाव फाटा, दुधाने वाडी, वऱ्हाड, रासळ, पाली, बलाप व राबगाव या गावांजवळ खड्डे पडले आहेत. इतर ठिकाणीदेखील कमी-अधिक प्रमाणात खड्डे आहेत. यामुळे येथे वारंवार अपघात होतात. मागील आठवड्यात तुकसई गावाजवळील खड्ड्यात दुचाकी आपटून एक तरुण गंभीर जखमी झाला होता.

वाहनांचे नुकसान
या खड्ड्यांत दुचाकी व चारचाकी वाहने आदळून अपघात तर होत आहेतच. त्याशिवाय वाहनांचे टायर फुटले तसेच चाकांच्या रिंग दबल्या आहेत. त्यामुळे प्रवासी व वाहचालकांना नुकसान सोसावे लागत आहे, असे स्थानिक नागरिक अमित निंबाळकर यांनी सांगितले.

उत्तर नाही
यासंदर्भात प्रतिक्रिया जाणून घेण्यासाठी एमएसआरडीसीचे कार्यकारी अभियंता सारंग इनामदार यांना भ्रमणध्वनीवर संपर्क केले असता त्यांनी फोन उचलला नाही.

एमएसआरडीसी अजून किती अपघातांची वाट बघणार आहे?
रस्त्याची दुरवस्था व खड्ड्यांमुळे अनेक अपघात होत आहेत, अनेकांचा मृत्यू झाला आहे. अनेक जण गंभीर जखमी होत आहेत. या रस्त्याची लवकरात लवकर दुरुस्ती करून खड्डे चांगल्या प्रकारे भरण्यात यावेत अन्यथा मनसे स्टाईलने आंदोलन केले जाईल.
- सुनील साठे, अध्यक्ष, मनसे, सुधागड तालुका

फोटो ओळ
पाली ः राज्य महामार्गावर अनेक ठिकाणी धोकादायक खड्डे पडले आहेत. छायाचित्र ः अमित गवळे

खड्ड्यात आदळून वाहनांचे झालेले नुकसान