सशस्त्र दरोड्याप्रकरणी सहा आरोपी जेरबंद

सशस्त्र दरोड्याप्रकरणी सहा आरोपी जेरबंद

पाली, ता. ६ (वार्ताहर) : सुधागड तालुक्यातील हातोंड, गोंदाव आणि माठळ या गावांमध्ये शनिवारी (ता. २६) रात्री पावणेदोन ते रविवारी (ता. २७) पहाटे सव्वातीन वाजताच्या दरम्यान पाच ते सहा जणांच्या सशस्त्र टोळीने फिल्मी स्टाइलने धुमाकूळ घालत घरांवर दरोडे टाकले होते. याप्रकरणी स्थानिक गुन्हे अन्वेषण विभागाच्या पथकाने बुधवारी (ता. ६) सहा आरोपींना पुणे व खालापूर येथून ताब्यात घेतले.

अजय एकनाथ चव्हाण (वय २३), पंजाबराव चव्हाण (वय), मल्हारी भानुदास चव्हाण (वय ३०), सुनील प्रकाश चव्हाण (वय ३२), सोमनाथ भानुदास चव्हाण (वय ३०), सुजल महेश चव्हाण (वय १९) अशी आरोपींची नावे आहेत. या टोळीने घरातील लोकांच्या गळ्यावर कोयता ठेवत आणि तलवारीचा धाक दाखवत लूटमार केली. सर्व घरांतील मिळून एक लाख रुपयांचे सोने, जवळपास ६० हजार रुपयांची रोकड आणि मोबाईल लंपास केले होते. यामुळे येथील ग्रामस्थांमध्ये भीती व दहशतीचे वातावरण आहे. या घटनेचे गांभीर्य ओळखून पोलिस अधीक्षक आंचल दलाल यांच्या आदेशानुसार हे प्रकरण स्थानिक गुन्हे अन्वेषण शाखेकडे वर्ग करण्यात आले. दरम्यान, पोलिस निरीक्षक मिलिंद खोपडे यांच्या मार्गदर्शनाखाली पथक तयार करण्यात आले. या पथकाने सीसीटीव्ही फुटेजसह वेगवेगळ्या माध्यमांतून दरोडेखोरांचा शोध सुरू केला. अखेर दरोडेखोर खालापूर, पुणे परिसरात असल्याची माहिती पथकाला मिळाली. वेगवेगळी पथके तयार करून सहा जणांना ताब्यात घेण्यात आले. त्यांच्याकडून मुद्देमाल जप्त करण्यात आला आहे.