मनातली खदखद उतरली कागदवर पालीतील दुर्लक्षित गंभीर समस्यांबाबत आयोजित निबंध स्पर्धेचा निकाल जाहीर सर्वेश गुरवने पटकावले प्रथम पारितोषिक

मनातली खदखद उतरली कागदवर
पालीतील दुर्लक्षित गंभीर समस्यांबाबत आयोजित निबंध स्पर्धेचा निकाल जाहीर
पाली, ता.१७ (वार्ताहर) ः अष्टविनायक तीर्थक्षेत्र पाली शहराला विविध समस्यांनी ग्रासले आहे. या दुर्लक्षित समस्यांकडे लक्ष वेधण्यासाठी आयोजित केलेल्या निबंध स्पर्धेचा निकाल शुक्रवारी (ता.१५) जाहीर झाला. या स्पर्धेत सर्वेश गुरव या तरुणाने अतिशय निर्भीड व वास्तव मांडणी करून प्रथम पारितोषिक पटकावले.
या स्पर्धेत संकेत खंडागळे यांनी द्वितीय क्रमांक व गौसखान पठाण यांनी तृतीय क्रमांक पटकवला. विजेत्या स्पर्धकांना रोख रक्कम व प्रशस्तीपत्र देण्यात आले. तर संजय लखीमळे, कशमीरा गुप्ते, वर्षा हुले, मुस्तफा शेख व विजय ठोंबरे यांना सहभाग प्रमाणपत्र देऊन गौरवण्यात आले. सर्वच स्पर्धकांनी अतिशय वास्तव, निर्भीड व प्रभावी मांडणी केली होती. यातून त्यांच्या मनातील खदखद व असंतोष स्पष्ट दिसत होता.
यावेळी ॲड. नरेश शिंदे, कपिल पाटील, अमित निंबाळकर, गौसखान पठाण, स्वप्नील खंडागळे, मंगेश लखीमळे, राजेश मपारा, आलाप मेहता, ललित ठोंबरे, प्रदीप गोळे, नंदू कुडपणे, सागर मोरे व सुराज गुरव आदींसह स्पर्धक उपस्थित होते.

गांधीगिरीचा मार्ग
पालीतील गंभीर व दुर्लक्षित समस्या सुटाव्यात यासाठी नागरिक आणि पाली सुधागड संघर्ष या संस्थेच्या माध्यमातून अनेक तक्रारी, निवेदने, निदर्शने, आंदोलने व वरिष्ठ पातळीवरील पाठपुरावा करण्यात आला. मात्र, प्रशासन व लोकप्रतिनिधी यांनी त्यांच्या मागण्यांना केराची टोपली दाखविल्याने संस्थेने अखेर नागरिकांकडूनच निबंधाच्या माध्यमातून या समस्या आणि विषयाला वाचा फोडण्याचा प्रयत्न केला जात आहे.

लोकप्रतिनिधी व प्रशासनाचे लक्ष वेधण्यासाठी
पाली सुधागड संघर्ष संस्थेच्या माध्यमातून एक अनोखी अशी निबंध स्पर्धा दर महिन्याला आयोजित केली जाणार आहे आणि यामध्ये शहरालगतच्या विविध समस्यांवर नागरिकांकडून निबंध मागवले जाणार आहेत. प्रथम, द्वितीय आणि तृतीय असे क्रमांक काढून स्पर्धकांना योग्य ते बक्षीस दिले जाईल. किमान या माध्यमातून तरी संबंधित प्रशासन व लोकप्रतिनिधी आणि पुढारी यांना जाग येऊन या समस्या मार्गी लागतील अशी आशा आहे.