आगरसुरेमध्ये अवैध दारूचा साठा जप्त

आगरसुरेमध्ये अवैध दारूचा साठा जप्त
सकाळ वृत्तसेवा
अलिबाग, ता.१७ : मांडवा सागरी पोलिसांनी आगरसुरे येथे छापा टाकून धडक कारवाई करत देशी दारूच्या बाटल्यांच्या साठ्यासह आरोपीला अटक केली आहे.
आगरसुरे ते बामणसुरे रोडवरील म्हात्रे पोल्ट्री समोरील मोकळ्या जागेत एक व्यक्ती अवैधरित्या दारूच्या बाटल्यांचा साठा करून तो बेकायदेशीर विक्री करत असल्याची गुप्त माहिती पोलिसांना मिळाली होती. त्यानुसार शुक्रवार (ता. १५) रोजी संध्याकाळी ७ वाजताच्या सुमारास संबंधित ठिकाणी छापा टाकून प्लॅस्‍टिकच्या एकुण २३५ बाटल्या जप्त केल्या आहेत. यावेळी असून एकूण १९ हजार ५२० रुपये किमतीचा साठा जप्त केला आहे. आगरसुरे येथील वसंत म्हात्रे (वय ७५) याच्याविरुद्ध पोलिस शिपाई सौरभ पाटील, मांडवा सागरी पोलिस यांनी फिर्याद दाखल केली आहे. यानुसार आरोपीस ताब्यात घेण्यात आले असून त्याच्यावर महाराष्ट्र दारूबंदी कायद्यानुसार गुन्हा दाखल केला आहे. रायगड जिल्हा पोलिस अधीक्षक आंचल दलाल यांनी दिलेल्या आदेशानुसार रायगड जिल्ह्यात अवैधरित्या चालणाऱ्या प्रत्येक अवैध धंद्यांवर कडक कारवाई करण्याचे आदेश देण्यात आले आहेत. यानुसार तालुक्यात अवैध दारुसाठा जप्त केला जात आहे.
------
मांडवा सागरी पोलिस ठाण्याच्या हद्दीत सुरू असलेल्या सर्व प्रकारच्या अवैध व बेकायदा धंद्यावर कडक कारवाई केली आहे, जात आहे. यापुढेही मोठ्या प्रमाणात कारवाई करण्यात येणार आहे. यामध्ये कोणाचीही गय केली जाणार नाही. अशा प्रकारच्या गुन्हेगारांवर जास्तीत जास्त प्रमाणात गुन्हे दाखल करून कडक कारवाई करण्यात येईल. यासाठी जागृत नागरिकांनी आपल्या परिसरात चालणारे बेकायदा धंदे व ते करणाऱ्या गुन्हेगारांची माहिती पोलिसांना द्यावी. संबंधित माहिती देणाऱ्यांचे नाव गुप्त ठेवण्यात येईल, असे मांडवा सागरी पोलिस ठाण्याचे पोलिस निरीक्षक सोमनाथ लांडे यांनी दिली.