रस्त्यांवर अवतरले चंद्रावरील खड्डे

रस्त्यांवर अवतरले चंद्रावरील खड्डे
बाप्पाच्या आगमनापूर्वी खड्डे भरा अन्यथा खड्ड्यांमध्ये वृक्षारोपण करणार
ठाकरे गटाचे पाली मुख्याधिकाऱ्यांना निवेदन
पाली, ता. १९ (वार्ताहर) ः शहरातील मुख्य व अंतर्गत रस्त्यांवर मोठे खड्डे पडले असून, जणू काही चंद्रावरील खड्डेच अवतरल्याचा भास होत आहे. काही दिवसांवर बाप्पाचे आगमन येऊन ठेपले आहे. तत्पूर्वी हे खड्डे भरा अन्यथा त्यामध्ये वृक्षारोपण करू, असा इशारा ठाकरे गटाने दिला आहे. पाली शहरप्रमुख विद्देश आचार्य यांच्या नेतृत्वाखाली मंगळवारी (ता. १९) पाली मुख्याधिकाऱ्यांना मागणीचे निवेदन दिले.
गणेशोत्सवासाठी दरवर्षी चाकरमानी पाली व सुधागड तालुक्यातील खेडोपाड्यांत येतात. तर पाली शहर हे अष्टविनायक तीर्थक्षेत्र आहे. मात्र पालीतील खड्डे भाविक व नागरिकांना डोकेदुखी ठरत आहेत. शहरातील जुने पोलिस ठाणे ते गणपती मंदिर, हाटाळेश्वर चौक ते विक्रम स्टँड आणि पालीतील अनेक ठिकाणच्या इतर रस्त्यांवर खड्ड्यांचे साम्राज्य पसरले आहे. खड्डे व खराब रस्त्यांमुळे गणेशमूर्ती आगमन व विसर्जन करणे नागरिकांसाठी त्रासदायक ठरणार आहे. या खड्ड्यांमध्ये आदळून दुचाकीस्वार गंभीर स्वरूपात जखमी झाले आहेत. तर कित्येक वाहनांचे नुकसानदेखील झाले आहे. हे खड्डे वेळीच बुजवले नाही तर गंभीर अपघात होऊन जीवितहानीही होऊ शकते. त्यामुळे याकडे तातडीने लक्ष देण्याची गरज आहे. यामुळे बाप्पाच्या आगमनापूर्वी रस्त्यावरील सर्व खड्डे भरावेत अन्यथा ठाकरे स्टाईलने खड्ड्यांमध्ये वृक्षारोपण करून आंदोलन करण्यात येईल, असा इशारा दिला आहे. दरम्यान, नगरपंचायतच्या मुख्याधिकारी माधुरी मडके यांना निवेदन देताना शिवसेना (उबाठा) पाली शहरप्रमुख विद्देश आचार्य, पाली उपशहर प्रमुख सूरज गुप्ता, किशोर चौधरी आणि ललित जावरे यांच्यासह शिवसैनिक उपस्थित होते.

फोटो ओळ
पाली ः पाली मुख्याधिकाऱ्यांना ठाकरे गटातील पदाधिकारी, शिवसैनिकांनी निवेदन दिले.