अलिबागमध्ये प्रचाराचे रणशिंग

अलिबागमध्ये प्रचाराचे रणशिंग
शिवसेनेकडून उमेदवारांची घोषणा, विरोधकांना धक्का
सकाळ वृत्तसेवा
अलिबाग, ता. २३ : जिल्हा परिषद आणि पंचायत समितीच्या निवडणुकांचे बिगुल वाजण्यापूर्वीच शिवसेनेने अलिबाग तालुक्यात निवडणुकीसाठीची तयारी सुरू केली आहे. याच अनुषंगाने आगामी निवडणुकीसाठी उमेदवारांची पहिली यादी जाहीर करताना विरोधकांना आश्चर्याचा धक्का दिला.
शिवसेनेने जिल्हा परिषद गट आणि पंचायत समिती गणासाठी संभाव्य उमेदवारांची नावे निश्चित करून प्रचारास सुरुवात केली आहे. जिल्हा परिषदेच्या आंबेपूर गटातून रसिका केणी यांना उमेदवारी देण्यात आली आहे, तर पंचायत समितीच्या आंबेपूर गणातून शैलेश पाटील, तर भोमोली गणातून कृष्णा लोहमी यांच्या नावाची घोषणा करण्यात आली आहे. निवडणूक आयोगाकडून अधिकृत निवडणूक कार्यक्रम जाहीर झाला नसताना उमेदवारांची घोषणा केल्याने अलिबाग तालुक्यातील शिवसेनेच्या कार्यकर्त्यांमध्ये उत्साह संचारला असल्याचे जिल्हाप्रमुख राजा केणी यांनी सांगितले.
-----------------------------
कार्यकर्ते कामाला
- निवडणुकीच्या घोषणेपूर्वीच उमेदवारांची घोषणा करण्याची शिवसेनेची ही रणनीती खूप महत्त्वाची आहे. यामुळे उमेदवारांना त्यांच्या गटात व गणात मतदारांपर्यंत पोहोचण्यासाठी अधिक कालावधी मिळेल. संभाव्य मतदारांना उमेदवारांचे नाव, चेहरा लवकर माहिती होईल.
- अचानक उमेदवारी जाहीर झाल्याने प्रतिस्पर्धी पक्ष आणि गटांना त्यांच्या उमेदवारांची निवड करण्यासाठी निवडणुकीच्या रिंगणात उतरवण्यासाठी घाई करावी लागेल. शिवसेनेच्या या निर्णयामुळे अलिबाग तालुक्यात निवडणुकीची वातावरणनिर्मिती झाली आहे.