होतकरू कलाकारांसाठी व्यासपीठ

होतकरू कलाकारांसाठी व्यासपीठ
पालीत दोनदिवसीय राज्यस्तरीय एकांकिका स्पर्धा
पाली, ता. १० (वार्ताहर) ः होतकरू, प्रतिभावंत कलाकारांना हक्काचे व्यासपीठ मिळवून देणाऱ्या प्रकाश देसाई सामाजिक, सांस्कृतिक प्रतिष्ठानच्या वतीने राज्यस्तरीय एकांकिका स्पर्धा होणार आहे. राज्यभरातील नाट्यरसिकांसाठी ही स्पर्धा पर्वणी ठरणार आहे.
या स्पर्धेतील प्रथम क्रमांक मिळवलेल्या एकांकिकेला एक लाख, द्वितीय क्रमांक मिळवलेल्या एकांकिकेला ७५ हजार, तर तृतीय क्रमांक मिळवलेल्या एकांकिकेस ५० हजार रोख रक्कम तसेच रायगड जिल्हा सर्वोत्तम एकांकिका १५ हजार व लक्षवेधी एकांकिका १५ हजार अशी रोख रक्कम बक्षिसे आणि आकर्षक पारितोषिक मिळणार आहेत. स्पर्धेचे यंदाचे हे तेरावे वर्ष आहे. या स्पर्धा पालीतील ग. बा. वडेर हायस्कुल रंगमंच येथे १८ ते २४ डिसेंबर सायंकाळी ७ वाजता सुरू होतील, अशी माहिती कार्यकारिणी मंडळाचे अध्यक्ष वेत्रवान गुरव, उपाध्यक्ष अभिजित चांदोरकर, सचिव शरद निकुंभ यांनी दिली. या एकांकिका स्पर्धेसाठी रसिकप्रेमींनी मोठ्या संख्येने उपस्थित राहावे, असे आवाहन केले आहे.
----------------------------------
ग्रामीण नाट्य मंडळांना उभारी
प्रकाश देसाई सामाजिक, सांस्कृतिक प्रतिष्ठानच्या वतीने २००८ पासून ही नाट्य चळवळ सुरू आहे. या माध्यमातून ग्रामीण भागातील नाट्य मंडळाचा गौरव करण्याची संकल्पना सुरू आहे. यंदा विविध क्षेत्रात काम करणाऱ्या व्यक्तींना समाज गौरव पुरस्कार देऊन सन्मानिक करण्यात येणार आहे.
-------------------------------
नवोदितांसाठीचा मंच
नाट्यसंस्था, नामवंत कलाकार अनेक महाविद्यालये भाग घेतात. यंदाही विविध नाट्य कलाकार मंचावर अभिनय करताना दिसणार आहेत. या स्पर्धेत अभिनय करणारे कलाकार मोठ्या पडद्यावर पाहावयास मिळतात.