अलिबागमध्ये साहित्यप्रेमींसाठी पर्वणी

अलिबागमध्ये साहित्यप्रेमींसाठी पर्वणी
दोनदिवसीय संमेलनात विविध कलाकृती पाहण्याची संधी
सकाळ वृत्तसेवा
अलिबाग, ता. १० : राज्य शासनाच्या मराठी भाषा विभाग, महाराष्ट्र राज्य साहित्य आणि संस्कृती मंडळ, तसेच कलारंग सांस्कृतिक सामाजिक संस्था, अलिबाग यांच्या संयुक्त विद्यमाने आणि कोकण साहित्य परिषद शाखा अलिबाग यांच्या सहकार्याने रायगड जिल्हा साहित्य संमेलन पार पडले. अलिबाग येथील श्रीबाग भंडारी भवनात दोनदिवसीय संमेलन पार पडले.
संमेलन उद्घाटनाच्या पूर्वसंध्येला साहित्य दिंडी काढण्यात आली. कान्होजी आंग्रे समाधीस्थळ ते भंडारी भवन मार्गावरून ही दिंडी मार्गस्थ झाली. दिंडीत सहभागी साहित्यप्रेमी, विद्यार्थी आणि नागरिकांनी ‘मराठी माझी मायबोली’, ‘वंदे मातरम्’, आणि ‘जय महाराष्ट्र’ अशा घोषणांनी अलिबाग शहरात जयघोष केला. या दिंडीमुळे शहरात उत्साह, अभिमान आणि मराठी संस्कृतीचा साज चढला. संमेलनाचे उद्घाटन संमेलनाध्यक्ष, सुप्रसिद्ध कवी व गीतकार अरुण म्हात्रे यांच्या हस्ते झाले. याप्रसंगी माजी जिल्हा परिषद सदस्य मानसी दळवी, महाराष्ट्र राज्य साहित्य व संस्कृती मंडळ सदस्य भरत गावडे, सदस्य विठ्ठल कदम, जिल्हा ग्रंथालय अधिकारी अजित पवार, को.म.सा.प रायगड अध्यक्ष संजय गुंजाळ, जिल्हा प्रतिनिधी गणेश कोळी, रायगड जिल्हा मराठी पत्रकार संघाचे उपाध्यक्ष नागेश कुलकर्णी उपस्थित होते.
---------------------
मुख्य आकर्षण
संमेलनात चर्चासत्र, परिसंवाद, मुलाखती, काव्यकट्टा, कथा वाचन, व्याख्यान आणि सांस्कृतिक आविष्कार असे विविध साहित्यिक कार्यक्रम होणार आहेत. कार्यक्रमाच्या आयोजनासाठी दीपक पाटील, रुपेश पाटील, महेश कवळे, विजय म्हात्रे आणि जयवंत वाणी यांनी विशेष परिश्रम घेतले आहेत.