लायन्स फेस्टिव्हलच्या माध्यमातून सांस्कृतिक मेजवानी

लायन्स फेस्टिव्हलच्या माध्यमातून सांस्कृतिक मेजवानी
अलिबाग, ता. १८ (वार्ताहर) : लायन्स क्लब ऑफ अलिबागच्या वतीने यंदाचा बहुप्रतीक्षित ‘लायन्स अलिबाग फेस्टिव्हल’ २३ ते २७ जानेवारीदरम्यान अलिबाग समुद्रकिनारी भव्य स्वरूपात साजरा होणार आहे. सामाजिक, शैक्षणिक व आरोग्यविषयक कार्यात कार्यरत असलेल्या लायन्स क्लबने यंदा ५९ वर्षांचा प्रवास पूर्ण केला असून, सातत्याने गेल्या १९ वर्षांपासून हा फेस्टिव्हल आयोजित केला जात आहे.
राज्य व जिल्ह्याबाहेरील उद्योजकांना व्यासपीठ देणाऱ्या या व्यापारी महोत्सवात यंदा १७५ हून अधिक स्टॉल्स उभारण्यात येणार आहेत. दागदागिने, पैठणी-साड्या, नामांकित ब्रँड्सची उत्पादने, चारचाकी-दुचाकी वाहनांचे प्रदर्शन तसेच ५० हून अधिक व्हेज व नॉनव्हेज खाद्यपदार्थांचे स्टॉल्स ग्राहकांचे आकर्षण ठरणार आहेत. कराओके स्पर्धा, पाककला स्पर्धा, पैठणी शो, शरीरसौष्ठव, पेट अँड ब्रीड शो, स्टँडअप कॉमेडी व सांगीतिक कार्यक्रमांसह सांस्कृतिक भरगच्च आयोजन करण्यात आले आहे.
या महोत्सवातून मिळणारा निधी लायन्स फाउंडेशनमार्फत मोतीबिंदू शस्त्रक्रिया, नेत्रदान व आरोग्य उपक्रमांसाठी वापरला जाणार असून, अलिबाग येथे होणाऱ्या मल्टीस्पेशालिटी हॉस्पिटलसाठीही उपयुक्त ठरणार आहे. नागरिकांनी मोठ्या संख्येने उपस्थित राहून फेस्टिव्हल यशस्वी करावा, असे आवाहन आयोजकांनी केले.