धेरंड येथे पेझारी केंद्राचा बाल आनंद मेळावा

धेरंड येथे पेझारी केंद्राचा बाल आनंद मेळावा
अलिबाग, ता. १९ : अलिबाग तालुक्यातील धेरंड येथे ग्रामस्थ मंडळ धेरंड, शाळा व्यवस्थापन समिती व पेझारी केंद्र शिक्षक वृंद यांच्या संयुक्त विद्यमाने आयोजित आनंददायी बाल मेळावा मोठ्या उत्साहात पार पडला. कार्यक्रमाची सुरुवात क्रांतिज्योती सावित्रीबाई फुले अभियान अंतर्गत काढण्यात आलेल्या ग्रंथ दिंडीने झाली. ढोल-ताशांच्या गजरात काढलेल्या या ग्रंथ दिंडीने विद्यार्थ्यांमध्ये व ग्रामस्थांमध्ये ज्ञानप्रेमाची जागृती घडवली.
मेळाव्याचे उद्घाटन मुरूड गट शिक्षणाधिकारी सुनील गवळी यांच्या हस्ते फित कापून करण्यात आले. यावेळी अलिबाग गट शिक्षणाधिकारी कृष्णा पिंगळा, बीट विस्तार अधिकारी पोयनाड विनोद पाटील, केंद्रप्रमुख पेझारी मनीषा टेमकर यांच्यासह ग्रामस्थ व मान्यवर उपस्थित होते.
कार्यक्रमात केंद्रप्रमुख टेमकर यांनी रा.जि.प. शाळा मोठे शहापूरचे मुख्याध्यापक संजय पाटील व रा.जि.प. शाळा पेझारीच्या विषय शिक्षिका नीलिमा पाटील यांना ‘केंद्रस्तरीय गुणवंत शिक्षक’ पुरस्कार देऊन सन्मानित केले. समूह नृत्य स्पर्धेत सहभागी विद्यार्थ्यांना धेरंड ग्रामस्थ व ज्ञानवाडी शाळेच्या मुख्याध्यापिका प्रतिभा भगत यांनी ट्रॉफी प्रदान केल्या. तसेच पेझारी शिक्षक वृंदाने सर्व विद्यार्थ्यांना शैक्षणिक साहित्यवाटप केले.
खाऊ स्टॉलमुळे विद्यार्थ्यांना खरेदी-विक्रीचा प्रत्यक्ष अनुभव मिळाला. दुपारनंतर फनी गेम्सचे आयोजन करण्यात आले व विजेत्यांना बक्षिसांचे वाटप करण्यात आले. मेळावा यशस्वी करण्यासाठी धेरंड ग्रामस्थ, मुख्याध्यापक उमेश पाटील व उपशिक्षिका आकांक्षा वर्तक यांनी विशेष परिश्रम घेतले.
----
फोटो लाईन - धेरंड येथे बाल मेळाव्यात उपस्थित मान्यवर, शिक्षकवृंद व विद्यार्थी