रायगड जिल्ह्यात हनुमान जयंती उत्साहात साजरी

रायगड जिल्ह्यात हनुमान जयंती उत्साहात
सकाळ वृत्तसेवा
अलिबाग, ता. २ : रायगड जिल्ह्यात हनुमान जयंतीचा उत्सव गुरुवार (ता. २) रोजी भक्तिमय वातावरणात आणि उत्साहात साजरा करण्यात आला. जिल्ह्यातील विविध हनुमान मंदिरांमध्ये पहाटेपासूनच भक्तांची मोठी गर्दी पाहायला मिळाली. भजन-कीर्तन आणि महाप्रसादाच्या कार्यक्रमांनी संपूर्ण वातावरण भक्तिरसात न्हाऊन निघाले. या निमित्ताने अनेक ठिकाणी मिरवणुका काढण्यात आल्या होत्या.
पहाटे काकड आरतीने उत्सवाची सुरुवात झाली. त्यानंतर हनुमान जन्मोत्सवानिमित्त विशेष पूजाअर्चा, अभिषेक व धार्मिक विधी पार पडले. अनेक मंदिरांमध्ये अखंड रामनाम जप, हरिपाठ आणि कीर्तनांचे आयोजन करण्यात आले होते. काही ठिकाणी पालखी मिरवणुका काढण्यात आल्या असून, ढोल-ताशांच्या गजरात भक्तांनी उत्साहाने सहभाग नोंदविला. अलिबाग, पनवेल, पेण, रोहा, माणगाव, महाड तसेच ग्रामीण भागातील मंदिरांमध्ये दिवसभर दर्शनासाठी भाविकांची रांग लागलेली होती. मंदिर परिसर आकर्षक फुलांची सजावट व विद्युत रोषणाईने उजळून निघाला होता. महिला मंडळे आणि युवक मंडळांच्या वतीने भजन, धार्मिक स्पर्धा तसेच सामाजिक उपक्रमांचे आयोजन करण्यात आले.
उत्सवानिमित्त काही संस्थांनी रक्तदान शिबिरे, स्वच्छता मोहिमा आणि सामाजिक जनजागृती कार्यक्रम राबवून उत्सवाला सामाजिक बांधिलकीची जोड दिली. कायदा व सुव्यवस्था राखण्यासाठी पोलिस प्रशासनाकडून ठिकठिकाणी बंदोबस्त ठेवण्यात आला होता.
शांततेत आणि भक्तिभावाच्या वातावरणात हनुमान जयंती साजरी झाल्याने जिल्हाभर आनंदाचे वातावरण निर्माण झाले होते. धार्मिक परंपरा जपत सामाजिक ऐक्याचे दर्शन घडविणारा हा उत्सव रायगडकरांसाठी विशेष ठरला.