इगतपुरीत बोगस कॉलसेंटरचा पर्दाफाश सीबीआयची कारवाई; एक कोटीहून अधिक रोकड, सोने जप्त

इगतपुरीत बोगस कॉल सेंटरचा पर्दाफाश
सीबीआयची कारवाई; एक कोटीहून अधिक रोकड, सोने जप्त
सकाळ वृत्तसेवा
इगतपुरी शहर, ता. १० : केंद्रीय गुप्तचर विभागाच्या पथकाकडून इगतपुरीत माेठी कारवाई करण्यात आली आहे. ऑनलाइन फसवणुकीच्या संशयावरून एका पंचतारांकित हॉटेलमध्ये भाड्याने घेतलेल्या जागेत काही व्यक्तींकडून चालवल्या जाणाऱ्या बेकायदेशीर खासगी कॉल सेंटरचा शुक्रवारी (ता. ८) पर्दाफाश केला. बोगस कॉल सेंटरमधून एक कोटीहून अधिकची रोकड, सोने जप्त केले असून, याप्रकरणी सहा जणांना अटक करण्यात आली आहे.
मोठ्या परताव्याचे प्रलोभन दाखवून संबंधितांच्या बँक खात्यामधून पैसे उकळल्याचे उघडकीस आल्यानंतर ही कारवाई करण्यात आली. या कारवाईत पथकाने सात आलिशान गाड्यांसह एक कोटीहून अधिक रोकड, सोने, लॅपटॉप, मोबाईल जप्त केले आहेत. ‘सीबीआय’ने यासंदर्भात प्रसृत केलेल्या एका निवेदनात ही माहिती देण्यात आली आहे. सहा आरोपींसह काही अज्ञात व्यक्ती तसेच बँक अधिकाऱ्यांविरोधात गुन्हा दाखल करण्यात आला आहे. एफआयआरनुसार आरोपींनी काही अज्ञातांशी संगनमत करून अनेक लोकांची फसवणूक करण्याचा कट रचला होता. यासाठी त्यांनी ‘अमेझॉन सपोर्ट सर्व्हिसेस’ नामक एक बोगस कॉल सेंटर बनवून त्यामार्फत नागरिकांची दिशाभूल करणारे कॉल करून आर्थिक फसवणूक केली असल्याची माहिती समोर आली आहे.

अन्य देशांतील लोकही फेऱ्यात
या बोगस कॉल सेंटरमार्फत अमेरिका, कॅनडा तसेच अन्य देशांतील लोकांनाही गंडा घालण्यात आल्याची बाब उघड झाली आहे. संशयित आरोपी त्यांच्याकडून गिफ्ट कार्डस तसेच क्रिप्टो करन्सीच्या नावाखाली अवैध पैसे उकळत होते. हे रॅकेट चालवण्यासाठी एकूण ६० ऑपरेटर्सना कंपनीत भरती केले होते, त्यात डायलर, व्हेरिफायर आणि क्लोजर अशा कर्मचाऱ्यांचा समावेश असल्याचे निवेदनात म्हटले आहे.

सीबीआयच्या हाती मोठे घबाड
सीबीआयने टाकलेल्या छाप्यात एकूण ४४ लॅपटॉप, ७१ मोबाईल फोन, १.२० कोटी रुपये रोख, ५०० ग्रॅम सोने आणि एक कोटी रुपये किमतीच्या सात लक्झरी कार जप्त करण्यात आल्या आहेत. एवढेच नव्हे तर पाच हजार USDT क्रिप्टो करन्सी (पाच लाख रुपये) आणि २००० कॅनेडियन डॉलरचे गिफ्ट व्हाउचर (१.२६ लाख रुपये)चे अवैध व्यवहार आढळून आले आहेत.
------------------