भाजपाच्या ‘हरघर संपर्क’ अभियानाला वावोशी येथे प्रारंभ

खोपोली, ता.१० (बातमीदार) : भारतीय जनता पक्षाच्या सरकारला केंद्रात नऊ वर्षे पूर्ण झाल्याच्या पार्श्वभूमीवर संपूर्ण देशभरात हर घर संपर्क अभियान प्रभावीपणे राबविण्यात येत आहे. तालुक्यात या अभियानाचा प्रारंभ वावोशी येथून विधानसभा निवडणूक प्रमुख किरण ठाकरे यांच्या उपस्थितीत करण्यात आला. यावेळी जिल्हा कोषाध्यक्ष सनी यादव, तालुका चिटणीस शशिकांत मोरे, तालुका युवा मोर्चा अध्यक्ष नागेश पाटील, तालुका कामगार आघाडी अध्यक्ष रवींद्र पाटील, रवींद्र मोरे, मोहन घाडगे, संदीप मोरे, महेश कडू, प्रणित रोनी इत्यादी सह अनेक कार्यकर्ते यावेळी उपस्थित होते. यावेळी विधानसभा निवडणूक प्रमुख किरण ठाकरे यांनी पंतप्रधान नरेंद्र मोदी यांच्या कारकीर्दीचा आलेख उपस्थित ग्रामस्थांसमोर मांडला. जिल्हा कोषाध्यक्ष सनी यादव यांनीही पंतप्रधान नरेंद्र मोदी यांच्या हर घर योजना या अभियानाचा खालापुर तालुक्यातील महिलांना लाभ मिळावा, यासाठी आम्ही सतत प्रयत्नशील असून या योजनेचा लाभ महिलांनी घ्यावा, तसेच ही योजना घरोघरी राबवत असल्याचे त्यांनी यावेळी सांगितले. केंद्र सरकारच्या विविध कल्याणकारी योजनांचा लाभ सर्वांनी घ्यावा असेही त्यांनी आवाहन केले.