खंडाळा घाटावर निर्सगाचा वरदहस्त

खोपोली, ता. ३ (बातमीदार)ः काही दिवसांपासून खोपोली परिसरात दमदार पाऊस सुरू आहे. या पावसाने निसर्ग अतिशय सुंदर बहरला असून सह्याद्रीच्या डोंगरमाथ्यावरून पांढरेशुभ्र पाण्याचे धबधबे, सर्वत्र पसरलेली हिरवाई, दाट धुक्यात दडलेल्या नागमोडी वळणांमुळे खंडाळा घाटावर निर्सगाचा वरदहस्त असल्याचे प्रतीत करत आहे.
श्रावणात ऊन-पावसाचा खेळ सुरू आहे. पावसाच्या सरी कोसळत असल्याने शेतांमध्ये हिरवीगार भातपिके डौलदार हेलकावे घेत आहेत. खोपोलीतील सर्व डोंगर- पर्वतांनी हिरवा शालू परिधान केल्याचे चित्र आहे. हा निसर्ग पर्यटक, गिर्यारोहकांचे आकर्षण ठरत आहेत. खंडाळा घाटातील नागमोडी वळणांवरील पांढरेशुभ्र धबधबे, दाट धुक्यात हरवलेला रस्ता आकर्षण बनले आहे.
-----------------------------------
पर्यटनस्थळांवरील बंदीने नाराजी
अपघातांच्या पार्श्वभूमीवर पर्यटनस्थळांवर जाण्यास बंदी घालण्यात आली आहे. यामुळे काही प्रमाणात नाराजीही उमटत आहे. तरीही मुंबई-पुण्याहून आठवड्याच्या शेवटी मोठ्या संख्येने विविध वयोगटातील पर्यटक खोपोली परिसराला भेट देत आहेत.