टाईम टेक्नोप्लास्ट उपोषणकर्त्यांची प्रकृती खालावली

महाड, ता. २९ (बातमीदार) : महाड एमआयडीसीतील टाईम टेक्नो प्लास्ट कंपनीविरोधात कामगारांनी आपल्या विविध मागण्यांसाठी आमरण उपोषण सुरू केले आहे. या उपोषणाला तिसरा दिवस उलटूनही कंपनी व्यवस्थापक कुठल्याही प्रकारची ठोस भूमिका घेत नसल्याने शनिवारी काही उपोषणकर्त्यांची प्रकृती खालावली.

कंत्राटी कामगारांना कामावर पुन्हा घेणे, पगारवाढ, कामगारांना सुरक्षा साधने पुरविणे अशा मागण्यांसाठी कंपनीच्या कामगारांनी उपोषण सुरू केले आहे. उपोषणाच्या तिसऱ्या दिवशीही कोणताही तोडगा न निघाल्याने उपोषणकर्त्यांपैकी आठ जणांची प्रकृती खालावली असल्याने त्यांना तातडीने महाड ग्रामीण रुग्णालयात दाखल करण्यात आले. यामुळे कंपनी परिसरात काही काळ तणाव निर्माण झाला होता.
घटनास्थळी पोलिस प्रशासन व डॉक्टर पोहोचले असून, काही कामगारांना अधिक उपचाराकरिता महाड ग्रामीण रुग्णालय येथे पाठविण्यात आले आहे. युवा सेना कोर कमिटी सदस्य विकास गोगावले यांनी उपोषणकर्त्यांची भेट घेऊन या उपोषणाला पाठिंबा दिला आहे. जोपर्यंत आमच्या मागण्या पूर्ण होत नाहीत तोपर्यंत उपोषण सुटणार नाही, असा ठाम निर्धार उपोषणकर्त्या कामगारांनी घेतला. याबाबत कंपनी व्यवस्थापनाची प्रतिक्रिया मिळू शकली नाही.