Mumbai News: दोघांमधील वाद सोडवायला जाणे पडले महागात; हॉटेल आचाऱ्यावर जीवघेणा हल्ला

Mahad News: हॉटेलमध्ये गोंधळ करणाऱ्या दोघांना रोखण्याचा प्रयत्न करणाऱ्या आचाऱ्यावर धारदार शस्त्राने जीवघेणा हल्ला करण्यात आला. महाड तालुक्यातील भावे गावच्या हद्दीत हा प्रकार घडला असून पोलिसांनी याप्रकरणी दोघांना अटक केली आहे.

भावे गावाच्या हद्दीत असलेल्या सुमय्या गार्डन बार अँड रेस्टॉरंटमध्ये रविवारी सायंकाळी जेवण करण्यासाठी आलेल्या दोन तरुणांमध्ये वादावादीतून गडबड, गोंधळ सुरू होता. या दोघांना हॉटेलचे आचारी बाळकृष्ण साळुंखे (वय ४०, राहणार तळिये) यांनी मज्जाव करण्याचा प्रयत्न केला. त्याचा राग आल्याने दोन्ही तरुणांनी साळुंखे यांच्यावरच धारदार शस्त्राने वार केले होते.

याप्रकरणी महाड एमआयडीसी पोलिस ठाण्यात तक्रार दाखल केल्यानंतर शुभम उर्फ राज तांबे आणि अमृत तांबे (दोघेही राहणार- भावे) यांना पोलिसांनी ताब्यात घेतले आहे. त्यांच्यावर भादंवि कलम ३०७, ३३६, ५०४, ५०६, ३४, तसेच महाराष्ट्र पोलिस अधिनियम ३७ (१)(३)/१३५ नुसार गुन्हा दाखल केला आहे.