किल्‍ले रायगडावरून हजारो शिवज्‍योती रवाना

महाड, ता. १७ (बातमीदार) : जय भवानी, जय शिवाजीचा जयघोष, भगवेमय झालेले रस्ते आणि चौक, धगधगत्या शिवज्योती हाती घेऊन धावणारे मावळे, खांद्यांवर आणि वाहनांवर फडकणारे भगवे ध्वज अशा उत्साही वातावरणात महाड व किल्‍ले रायगडावर सोमवारी तिथीनुसार शिवजयंती साजरी करण्यात आली.
शिवरायांच्या पायी नतमस्तक होऊन शिवज्योती आपल्या गावी नेण्यासाठी रायगड किल्ल्यावर शिवप्रेमींनी गर्दी केली होती. महाड, माणगाव, मंडणगड, गोरेगाव, चिपळूण, खेड, पोलादपूर, भोर, पुणे, सातारा अशा विविध ठिकाणी सुमारे १२०० शिवज्योती नेण्यात आल्या. आपल्या गावात ही शिवज्योती स्थापन करून शिवजयंती उत्साहात साजरी करण्यात आली.
रायगड किल्ला तसेच रायगडावरून आणलेल्या शिवज्योतींमुळे किल्ल्याकडे जाणारा रस्ता तसेच शहरातील अनेक रस्ते भगवेमय झाले होते. अनेक जण दुचाकीवर, खांद्यावर भगवा ध्वज घेऊन रायगडहून आपल्या गावात जाताना दिसत होते. अनेक वाहनांवरही भगवे ध्वज लावण्यात आले होते.
शहरातील छत्रपती शिवाजी महाराज चौकात शिवज्योतींचे विविध मंडळांकडून स्वागत करण्यात आले. या ठिकाणी येणाऱ्या शिवप्रेमींसाठी चहा-नाश्त्याची सोय करण्यात आली होती. सकाळपासूनच शिवज्योती घेऊन येणारी मंडळी छत्रपती शिवाजी महाराज चौकात दाखल होत असल्याने मोठी गर्दी उसळली होती. शिवप्रेमी तसेच महिलांनी या ठिकाणी रिंगण धरून लेझीम नृत्य केले. हातामध्ये मोठ-मोठे भगवे ध्वज तसेच जाणता राजाचे ध्वज उंच फडकवले जात होते. गावागावातून टेम्पो, ट्रक यामध्ये शिवप्रेमी गर्दी भरून आपल्या गावांना शिवज्योती घेऊन जात होते. वाहनांवर लावलेले मोठ-मोठे ध्वज तसेच शिवघोषणांनी सकाळपासूनच महाडचा परिसर दणाणून गेला होता.
महाड शहरातील चौकाचौकांत तसेच गाव-वाड्यांवर शिवजयंती साजरी करण्यात आली. महाडमधील छत्रपती शिवाजी महाराजांच्या पुतळ्याला रोषणाई करण्यात आली होती. महाडमध्ये छत्रपती शिवाजी महाराज सार्वजनिक जयंती उत्सव मंडळाच्या वतीने शिवजयंती उत्सव साजरा करण्यात आला.

चुनाभट्टीची शिवज्योत
रायगड किल्ल्यावरून अनेक सामाजिक संस्था व मंडळे तसेच शिवप्रेमी आपापल्या गावी येथून शिवज्योती घेऊन जातात. अनेक जण पायी शिवज्योती नेतात. अशाच मुंबई-चुनाभट्टी येथील जाणता राजा सामाजिक संस्थेच्या माध्यमातून २४ वर्षांपासून शिवज्योत रायगडावरून नेली जाते. शिवजयंतीच्या आदल्या दिवशी सर्व शिवप्रेमी गडावर दाखल होतात. तेथून महाड, लोणेरे व पेण येथे थांबा घेत शिवज्योत मुंबईकडे शिवजयंतीच्या दिवशी सकाळपर्यंत दाखल होते. अनेक वर्षे या शिवज्योतीचे महाड येथे स्वागत व अल्पोपाहाराची व्यवस्था कोकण कडा मित्र मंडळाच्या वतीने करण्यात येते. जाणता राजा संस्थेकडूनदेखील ज्या ठिकाणी शिवज्योत थांबा घेते, त्या ठिकाणी असणाऱ्या आयोजकांना भेटवस्तू म्हणून बीज मोदक देण्याची अभिनव कल्पनाही यावर्षीपासून राबवली जात आहे. यामुळे शिवज्योतीच्या माध्यमातून वृक्ष लागवडीचा संदेश व प्रसार होत आहे.

महाड ः रायगडावरून शिवज्योती गावी निघाल्‍या. या वेळी शिवप्रेमींनी लेझीम नृत्य सादर केले.