आपत्कालीन स्थितीत मदत कार्यासाठी नगरपालिका सज्ज
महाड, ता. २९ (बातमीदार) : दरवर्षी महाड शहराला पुराचा फटका बसतो. २०२१ मध्ये आलेल्या महापुरात शहराचे अतोनात नुकसान झाले होते. शहरात निर्माण होणाऱ्या पूर व इतर आपत्कालीन स्थितीमध्ये तातडीने बचावकार्य मिळावे, या दृष्टीने महाड नगरपालिकेच्या वतीने शहरातील नागरिक, विविध संस्था, आपदा मित्र यांच्यासाठी तीनदिवसीय बचावकार्य प्रशिक्षण सुरू केले आहे.
महाड नगर परिषद व आपत्कालीन विभागामार्फत शुक्रवारपर्यंत आयोजित केलेल्‍या प्रशिक्षणासाठी मुख्याधिकारी धनंजय कोळेकर, आपत्कालीन विभागप्रमुख रोहित भोईर, तसेच नगरपालिकेच्या विभाग विभागाचे अधिकारी व प्रशिक्षणार्थी उपस्थित होते. महाड नगरपालिकेचे कार्यालय व होडीबंदर या ठिकाणी प्रशिक्षण दिले जात आहे. पूरस्‍थितीत नागरिकांना स्थलांतरित करणे, अडचणीत सापडलेल्यांना मदतकार्य करणे तसेच इतर कोणतीही आपत्कालीन परिस्थिती निर्माण झाल्यास तातडीने मदतकार्य करून जीवितहानी टाळणे, हा या प्रशिक्षणाचा मुख्य उद्देश आहे. संकटमोचन दल या संस्थेकडून प्रशिक्षण देण्यात येत आहे. बुधवारी (ता. २८) सावित्री नदीमध्ये होडी कशी चालवावी, इंजिन होडीचा वापर कसा करावा, पाण्यात पडलेल्या व्यक्तीला कसे वाचवावे, तसेच त्याला बाहेर काढून त्याचा पोटातील पाणी कशाप्रकारे बाहेर काढून जीव वाचवावा, याबाबतचे प्रात्यक्षिक दिले. प्रशिक्षणामध्ये आपत्कालीन परिस्थितीत मदतकार्य कसे करावे, हे प्रात्यक्षिकासह दाखवण्यात आले. पुरामध्ये अडकलेल्या व्यक्तीला बाहेर कसे काढावे, त्याचा जीव कसा वाचवावा, रक्त वाहत असल्यास नियंत्रण कसे मिळवावे, याबाबतही प्रशिक्षण देण्यात आले.
बचावकार्यामध्ये वापरण्यात येणाऱ्या साहित्याचा वापर, तसेच बचावकार्यातील समन्वय, सापांविषयीची माहिती, सर्पदंश झाल्यास घ्यावयाची काळजी व त्वरित करावयाचे मदतकार्य याबाबतची सखोल माहिती प्रशिक्षणामध्ये देण्यात आली. प्रशिक्षणातून तयार झालेली तरुण पिढी तसेच प्रशिक्षणार्थी पूर परिस्थिती व इतर आपत्कालीन स्थितीमध्ये मदतकार्य करून सरकारला सहकार्य करणार आहे.
महाड शहरांमध्ये पूर येणे तसेच इतर आपत्ती सातत्याने घडत असतात. अशा वेळी नागरिकांना तातडीने मदत करून त्यांचा जीव वाचवणे गरजेचे असते. बचावकार्याबाबत योग्‍य माहितीसाठी नगरपालिकेने मोफत प्रशिक्षण आयोजित केले असून इच्छुक नागरिकांनी प्रशिक्षणात सहभाग घ्यावा.
- रोहित भोईर, प्रमुख, आपत्कालीन विभाग
महाड ः बचावकार्याबाबत प्रशिक्षण देण्यात आले.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.