तलाठी कार्यालय, संस्‍थांना बचावकार्य साहित्य वाटप

तलाठी कार्यालय, संस्‍थांना बचावकार्य साहित्य वाटप

महाड, ता. २२ (बातमीदार) : महाड शहर व तालुक्यामधील नागरिकांना वारंवार नैसर्गिक आपत्तीचा सामना करावा लागतो. अशावेळी बचावकार्यात सहभाग घेणाऱ्या महाडमधील दोन संस्था व प्रत्येक तलाठी कार्यालयाला बचाव कार्य साहित्याचे वाटप प्रांताधिकारी पोपट ओमासे यांच्या हस्ते करण्यात आले.
जिल्हा आपत्ती व्यवस्थापन विभागाकडून विविध बचावकार्याचे साहित्य महाड नगरपालिकेमध्ये पाठवण्यात आले होते. शनिवारी (ता.२१) नगरपालिकेच्या प्रांगणामध्ये या बचाव कार्य साहित्याचे वाटप करण्यात आले व साहित्य कसे वापरावे, यांचे प्रात्यक्षिकही दाखवण्यात आले. कार्यक्रमाला तहसीलदार महेश शितोळे, नायब तहसीलदार सी. आर. पाटील, महाड नगरपालिका मुख्याधिकारी धनंजय कोळेकर, निवासी नायब तहसीलदार बी. एस. भाबड आदी उपस्थित होते.
महाड व पोलादपूर तालुके पूर व दरड प्रभावक्षेत्र असून या ठिकाणी पावसाळ्यात मोठ्या प्रमाणात जीवित व वित्तहानी होत असते. पावसाळ्यातील अनेक आपत्तीच्या वेळी रेस्क्यू ऑपरेशन करण्यासाठी लागणारे साहित्य त्या त्या भागात जर उपलब्ध असेल तर बचावकार्य लवकरात लवकर करणे सोपे होते. याचा विचार सरकारने करून अशी आपत्ती बचाव कार्य केंद्र नियोजित ठिकाणी शोधणे आणि तिथे माहिती संपर्काची आवश्यक संसाधने उपलब्ध करून त्यांना प्रशिक्षण देणे, ही कामे जलद गतीने पूर्ण जबदारीने करण्यासाठी प्रत्येक तलाठी कार्यालय अंतर्गत ही साधनसामग्री उपलब्ध करून देण्यात आली आहे. महाड शहरातील दोन सामाजिक संस्थांना देखील अशाप्रकारे साहित्य वाटप करण्यात आले. लाईफ जॅकेट, लाईफ बोये, बॅटरी, स्ट्रेचर इत्यादी साहित्यांचा यात समावेश आहे.

महाड ः प्रांताधिकारी पोपट ओमासे यांनी बचाव कार्यातील साहित्य वाटप केले.