अण्णाभाऊ साठे शिष्यवृत्तीसाठी अर्ज करण्याचे आवाहन

महाड, ता. ७ (बातमीदार) : दहावी, बारावी, पदवी व पदव्युत्तर परीक्षेत जिल्‍ह्यातील विशेष प्रावीण्य मिळविणाऱ्या पहिल्या तीन किंवा पाच विद्यार्थ्यांना दरवर्षी निधीच्या उपलब्धतेनुसार प्रोत्साहनपर अण्णा भाऊ साठे शिष्यवृत्ती योजनेचा लाभ देण्यात येतो. यासाठी वि‌द्यार्थ्यांनी २० जुलै २०२५ पूर्वी अर्ज करावेत, असे आवाहन महामंडळाकडून करण्यात आले आहे.
साहित्यरत्न लोकशाहीर अण्णा भाऊ साठे विकास महामंडळाच्या वतीने (मर्या.) शैक्षणिक वर्षात दहावी, बारावी, पदवी, पदव्युत्तर, वैद्यकीय व अभियांत्रिकी अभ्यासक्रमामध्ये विशेष प्रावीण्याने ६० टक्केपेक्षा जास्त गुण मिळवून उत्तीर्ण झालेल्या संबंधित जातीतील विद्यार्थी, विद्यार्थिनींना महामंडळाकडून ज्‍येष्ठता व गुण क्रमांकानुसार प्रोत्साहनपर अण्णा भाऊ साठे शिष्यवृत्ती योजनेचा लाभ देण्यात येतो. अर्जासोबत अण्णा भाऊ साठे शिष्यवृत्ती मिळण्यासाठी हस्तलिखित अर्ज, २०२४-२५ या शैक्षणिक वर्षात उत्तीर्ण झाल्याचे गुणवत्ता प्रमाणपत्र, शाळा सोडल्याचा दाखला, जातीचा दाखला, पुढील वर्षात प्रवेश घेतल्याची पावती, रेशन कार्ड, आधार कार्ड ही कागदपत्रे महामंडळाच्या जिल्हा कार्यालयात सादर करणे आवश्‍यक आहे.