भावनिक, सामाजिक, कौशल्यावर विद्यार्थ्यांचे मूल्यांकन

महाड, ता. ८ (बातमीदार) : नव्या शैक्षणिक धोरणानुसार समग्र प्रगती पत्रक ही संकल्पना विद्यार्थ्यांच्या मूल्यांकनासाठी वापरली जाणार असून, आता बहुआयामी दृष्टिकोनातून विद्यार्थ्यांचे मूल्यांकन केले जाणार आहे. पूर्वीप्रमाणे विद्यार्थ्यांचे प्रगती पुस्तक केवळ पारंपरिक परीक्षा व चाचण्यांवर अवलंबून न राहता भावनिक, सामाजिक आणि विविध कौशल्यावर आधारित असे मूल्यमापन केले जाणार आहे. याचा विद्यार्थ्यांना पुढील आयुष्यासाठी मोठा उपयोग होणार आहे.
२०२५ पासून राज्यातील सर्व शाळांमध्ये समग्र प्रगती पत्रक ही संकल्पना पहिलीपासून राबवली जाणार आहे. विद्यार्थ्यांच्या शैक्षणिक मूल्यांकनासह त्याच्या संपूर्ण व्यक्तिमत्त्वावर लक्ष ठेवणारा असा हा उपक्रम आहे. यामुळे केवळ शैक्षणिक प्रगतीच नव्हे तर कला, क्रीडा व अनुभवावर आधारित शिक्षणाचा यात समावेश राहणार आहे. कला-क्रीडाच्या माध्यमातून विद्यार्थ्यांमध्ये नेतृत्व गुण व कल्पकता यांना विशेष वाव दिला जाणार आहे. विविध खेळ, नाट्यसंगीत, चित्रकला अशा माध्यमातून विद्यार्थ्यांमधील विविध पैलू प्रकाश झोतात येण्यास मदत होणार आहे.
नवीन शैक्षणिक धोरणानुसार समग्र प्रगती पत्रकाच्या वापरामध्ये केवळ ज्ञान मिळवणे एवढेच महत्त्वाचे नाही, तर विद्यार्थ्यांचा व्यक्तिमत्त्व विकास, सामाजिक विकास आव्हानाला सामोरे जाण्यास विद्यार्थ्यांना सक्षम करणे तसेच त्यांचा सामाजिक शैक्षणिक व भावनिक विकास यांना विशेष प्रोत्साहन दिले जाणार आहे.

समुदायाशी संवाद साधण्याचे प्रशिक्षण
समुदाय आधारित शिक्षणावरही भर दिला जाणार असून, विद्यार्थ्यांना वेगवेगळ्या समुदायाशी संपर्क व संवाद साधण्याचे प्रशिक्षण दिले जाणार आहे. विद्यार्थ्याला असणारे चौकस ज्ञानही आता तपासले जाणार आहे. त्यामुळे येत्या काळात निर्माण होणारे विद्यार्थी केवळ पुस्तकी ज्ञान मिळवणारे असणार नाहीत, तर त्यांचा समाजाशी कलेशी, विविध कौशल्याशी भावनिक नात्यांची संबंध असणार आहे.