गिरीमित्र संमेलनात साद सह्याद्री प्रतिष्ठानचा सन्मान

महाड, ता. १५ (बातमीदार) : सामाजिक, ऐतिहासिक आणि पर्यावरण क्षेत्रात सातत्याने उल्लेखनीय कार्य करणाऱ्या महाड तालुक्यातील बिरवाडी येथील साद सह्याद्री संस्थेला २२ व्या गिरिमित्र संमेलनात ‘शरद ओवळेकर गिरिमित्र विशेष सन्मान’ देऊन गौरवण्यात आले.
मुलुंड येथे १२ व १३ जुलैला आयोजित केलेल्या सोहळ्यात जर्मनीच्या प्रख्यात गिर्यारोहक इनस पपर्ट, नेपाळचे लक्स्पा शेर्पा यांच्यासह महाराष्ट्रातील विविध क्षेत्रांतील मान्यवर उपस्थित होते. सह्याद्री प्रतिष्ठान संस्थेने मढेघाट येथील पुरातन बारव जतन व संवर्धन, कोकणातील पहिल्या बारव वास्तुकलेचे दस्तऐवजीकरण, कांगोरीगड आणि पुरातन वरंध घाट जतन मोहिमा यातून ऐतिहासिक वारसांचे जतन केले आहे. प्रशासनासोबत पूरस्थिती, कोरोना काळ अशा आपत्ती व्यवस्थापनात सक्रिय अहवाल दिला असून, महाडमधील २८ गावांमध्ये एकाच वेळी प्रजासत्ताकदिनी वृक्षारोपण यांसारख्या कार्यांतून संस्थेने सामाजिक बांधिलकी जपली आहे.
शेकडो मुलांना शालेय साहित्यवाटप, दुर्गम भागात करिअर मार्गदर्शन शिबिर, आरोग्य शिबिरांचे आयोजन, औद्योगिक क्षेत्रातील गावांना औद्योगिक सुरक्षेबद्दल मार्गदर्शन, दरवर्षी मराठी भाषादिन साजरा करणे आणि दिवाळीत गडकिल्ले स्पर्धांसारख्या अनेक उपक्रमांद्वारे साद सह्याद्री प्रतिष्ठान संस्थेने समाजाच्या विविध स्तरांवर सकारात्मक प्रभाव टाकला आहे. मॅरेथॉन व विविध क्रीडा उपक्रम, रायगड प्रदक्षिणा, साहसी खेळांचे आयोजन आणि सह्याद्रीतील विविध संस्थांसोबत कामाच्या माध्यमातून संस्थेने तरुणांना प्रोत्साहन दिले आहे.

पर्यावरणपूरक गणेशोत्‍सव स्‍पर्धांचे आयोजन
बिरवाडीतील साद सह्याद्री संस्थेने कोकणदिवा, कांगोरीगड आणि महेंद्रगड या तीन किल्ल्यांवर ध्वजारोहण करून देशाभिमान आणि इतिहासाप्रति आदर व्यक्त केला आहे. श्री छत्रपती संभाजी महाराज राज्याभिषेक सोहळ्यात रायगडावर पालखीचा मान स्वीकारणे आणि गणपतीमध्ये पर्यावरणपूरक गणपती स्पर्धांचे आयोजन करणे हे संस्थेच्या सांस्कृतिक कार्याचे उत्कृष्ट नमुने आहेत. या सेवाभावी कार्याची दखल घेत त्यांना विशेष सन्मानित करण्यात आले.
......
फोटो - नेपाळच्या प्रख्यात गिर्यारोहकांच्या हस्ते पुरस्कार स्वीकारताना साद सह्याद्रीचे पदाधिकारी.