शिक्षक पुरस्कारासाठी आता नवीन निकष

महाड, ता. २१ (बातमीदार) : शिक्षण क्षेत्रामध्ये उल्लेखनीय काम करणाऱ्या शिक्षकांचा सन्मान करण्यासाठी क्रांतिज्योती सावित्रीबाई फुले राज्य शिक्षण गुणगौरव पुरस्कार सरकारकडून दिला जातो. परंतु आता शिक्षण विभागाने पुरस्काराच्या निकषांमध्ये मोठे बदल केल्याने आता हा पुरस्कार शिक्षकांच्या गुणांच्या चौकटीमध्ये होणार आहे.
गुणवंत शिक्षकांच्या कार्याची दखल घेण्यासाठी सरकारकडून क्रांतिज्योती सावित्रीबाई फुले राज्य शिक्षण गुणगौरव पुरस्कार दिला जातो. या पुरस्कारासाठी पूर्वी १७ निकष निश्चित करण्यात आले होते. परंतु आता या निकषांमध्ये नव्याने काही निकष समाविष्ट करण्यात आले आहेत. या सुधारित निकषांच्या आधारे राज्यातील शिक्षकांच्या गुणांचे मूल्यमापन केले जाणार आहे. याकरिता १०० गुणांची नियमावली तयार करण्यात आली आहे.
पुरस्कारासाठी यापूर्वी काही निकष निश्चित करण्यात आले होते. त्यामध्ये आता नव्याने वाढ करण्यात आली आहे. या नवीन निकषांत शिक्षकाने शाळेच्या विकासासाठी समाजाकडून मिळवलेले सहकार्य, ग्रंथलेखन, प्रशिक्षणामध्ये तज्‍ज्ञांचे मार्गदर्शन, विद्यार्थ्यांच्या शैक्षणिक प्रगतीसाठी नवोपक्रम, शैक्षणिक पात्रता व संशोधनात्मक कार्य, सरकारी व सरकारमान्य संस्थांकडून मिळालेले पुरस्कार, डिजिटल माध्यमातून शैक्षणिक साहित्याची निर्मिती, शाळेमध्ये आनंददायी वातावरण निर्माण करणे, साक्षरता मोहिमेमध्ये सहभाग, शैक्षणिक स्पर्धा व चाचण्या असे नवीन निकष समाविष्ट करण्यात आले आहेत. या निकषांसह शिक्षक गुणगौरव पुरस्कार दिला जाणार आहे.

१०९ शिक्षकांचा गौरव होणार
शिक्षण विभागाने नुकतेच एक सुधारित परिपत्रक जाहीर केले आहे. राज्यामध्ये या वर्षी एकूण १०९ शिक्षकांची पुरस्कारासाठी निवड केली जाणार आहे. यामध्ये प्राथमिक ३८, माध्यमिक ३९, आदिवासी क्षेत्रातील १९, सावित्रीबाई फुले आदर्श शिक्षिका आठ, कला- क्रीडा विशेष शिक्षक दोन, दिव्यांग शिक्षक एक तर स्काऊट गाइड एक शिक्षक अशा पद्धतीने हे पुरस्कार दिले जाणार आहेत.
......