नाते गावात कृषीकन्यांकडून चाऱ्याच्या प्रक्रियेचे प्रात्यक्षिक

नाते गावात कृषिकन्यांकडून चाऱ्याच्या प्रक्रियेचे प्रात्यक्षिक
महाड, ता. ३ (बातमीदार) : कृषिप्रधान असलेल्या रायगड जिल्ह्यातील भूमिपुत्र शेतकऱ्यांना आधुनिक तंत्रज्ञान आणि नवीनतम शेत तंत्र याची माहिती उपलब्ध व्हावी, या उद्देशाने डॉ. बाळासाहेब सावंत कोकण कृषी विद्यापीठ दापोली संलग्न मोहोप्रे येथील कृषी महाविद्यालयाच्या चतुर्थ वर्षातील कृषिकन्यांनी ग्रामीण कृषी जागरूकता कार्यानुभव कार्यक्रमांतर्गत शेतकऱ्यांना चाऱ्याच्या प्रक्रियेचे प्रात्यक्षिक करून दाखविले.
२८ जुलैला झालेल्या या प्रात्यक्षिकामध्ये कृषिकन्यांनी विविध प्रकारचे चारे, त्यावर केलेल्या उपचार पद्धती, त्याचे फायदे आणि वापरण्याच्या योग्य पद्धती यावर मार्गदर्शन केले. तसेच सर्वाधिक वापरली जाणारी युरिया उपचार पद्धतीची माहिती दिली. युरिया व पाणी यांचे मिश्रण करून कडब्यावर फवारणी केली जाते आणि त्यानंतर कडबा काही दिवस झाकून ठेवला जातो. यामुळे तो अधिक नरम, पचण्याजोगा आणि पौष्टिक बनतो, असे या वेळी सांगितले. कृषी महाविद्यालय मोहोप्रे कृषिकन्यांमध्ये कार्तिकी पाटील, समृद्धी बांगर, साक्षी जाधव, पूजा पंडुरे, इल्हाम पल्लवकर, स्नेहा राऊत व तीर्था सातनाक यांचा समावेश आहे. या वेळी नाते गावातील सर्व ग्रामस्थ उपस्थित होते. याबद्दल कृषिकन्यांनी त्यांचे आभार मानले. कृषी महाविद्यालय मोहोप्रेचे प्राचार्य डॉ. व्ही. जे. गिम्हवणेकर, कार्यक्रम अधिकारी डॉ. एस. एस. रायकर व विषयतज्ज्ञ‍ प्रा. एस. एस. संकपाळ यांच्या मार्गदर्शनाखाली चाऱ्याच्या प्रक्रियेचे प्रात्यक्षिक करून दाखविण्यात आले.