सापे-वामने स्थानकात गैरसोई

सापे-वामने स्थानकात गैरसोई
कोकण रेल्वे प्रशासनाचे दुर्लक्ष, प्रवासी वर्गात संताप
महाड, ता. ३१ (बातमीदार)ः महाडपासून ११ किलोमीटर अंतरावरील सापे वामने रेल्वेस्थानकात विविध समस्या आहेत.
या स्थानकात दादर-रत्नागिरीसह दिवा-सावंतवाडी या दोनच पॅसेंजर गाड्या थांबत असल्याने मुंबईकडे जाण्यासाठीची व्यवस्था आहे, पण कोकण रेल्वे प्रशासनाच्या दुर्लक्षामुळे गैरसुविधांअभावी प्रवासीवर्गात तीव्र नाराजी आहे.
कोकण रेल्वेचे सापे वामने रेल्वेस्थानकासाठी ३० गावांतील ग्रामस्थांनी विविध आंदोलने केली होती. या ठिकाणी स्थानक मंजूर झाल्यानंतर त्याची उभारणीही करण्यात आली. या रेल्वे क्रॉसिंगकरिता स्थानकाचे नूतनीकरण करण्यात आले. सद्यःस्थितीमध्ये या स्थानकावर दादर-रत्नागिरी व दिवा- सावंतवाडी या पॅसेंजर गाड्याच थांबतात. त्यामुळे परिसरातील प्रवाशांना मुंबई, अन्य ठिकाणी जाण्यासाठी कोणताही उपयोग होत आहे. त्यामुळे हळूहळू या स्थानकावर प्रवाशांची गर्दी देखील वाढली आहे, परंतु त्या तुलनेत या रेल्वेस्थानकाच्या देखभाल दुरुस्तीकडे रेल्वे प्रशासनाचे दुर्लक्ष झाल्याचे दिसत आहे. या रेल्वेस्थानकावर एकच फलाट असून, रेल्वे रूळ आणि फलाटातील अंतर जास्त असल्याने प्रवाशांना मोठी कसरत करावी लागत आहे.
-----------------------------
विविध अडचणींचा सामना
स्थानकावर प्रवाशांना बसण्याकरिता व्यवस्था नाही. स्थानकावर जाण्यासाठी कच्चा रस्ता तयार करण्यात आला आहे, परंतु सहा वर्षांपासून या ठिकाणी केवळ खडी टाकण्यात आलेली आहे. त्यामुळे पावसाळ्यात हा रस्ता चिखलमय होतो. तसेच फलाटावर फूटभर गवत वाढले असल्याने स्थानकातून बाहेर येताना विविध अडचणी येत आहेत. महत्त्वाचे म्हणजे, कर्मचाऱ्यांसाठी दोन निवासस्थाने बांधण्यात आली होती, परंतु त्याचा वापर होत नसल्याने दुरवस्था झालेली आहे.
..........
सापे वामने रेल्वेस्थानकाच्या गैरसोई दूर कराव्यात याकरिता रेल्वे प्रशासनाकडे वारंवार मागणी केली आहे. स्थानकातील गवत काढावे. फलाटाची उंची वाढवावी, अशी मागणी केली आहे, परंतु याकडे दुर्लक्ष होत असल्याने तीव्र आंदोलन करावे लागेल.
-मन्सूर देशमुख, अध्यक्ष, कोकण रेल्वे प्रकल्पग्रस्त कृती समिती
........