कोकणात प्रथमच गुरुदेव श्री श्री रविशंकर यांचे आगमन, महाड येथे भव्य 21 जानेवारीला कोकण अमृतसंध्या महासत्संग

कोकणात प्रथमच श्री श्री रविशंकर यांचे आगमन
महाड येथे २२ जानेवारीला कोकण अमृतसंध्या महासत्संग

महाड, ता. १८ (बातमीदार) : आध्यात्मिक गुरू व आर्ट ऑफ लिव्हिंग फाउंडेशनचे संस्थापक श्री श्री रविशंकर यांचे कोकणात प्रथमच आगमन होत आहे. त्या पार्श्वभूमीवर २२ जानेवारीला महाड शहरात ‘कोकण अमृतसंध्या’ महासत्संगाचे आयोजन करण्यात आले आहे.
हा महासत्संग चिचकर ग्राउंड येथे सायंकाळी ६ वाजता होणार आहे. कार्यक्रमासाठी प्रवेश विनामूल्य असणार आहे. या महासत्संगाची माहिती देण्यासाठी १७ जानेवारीला शासकीय विश्रामगृह, महाड येथे पत्रकार परिषद घेण्यात आली. या वेळी संस्थेच्या वतीने डॉ. नामदेव घोलप, मंजू पित्रे, धीरज शिंदे, दगडू गांगुर्डे, समीर सावंत, आबासाहेब कदम, अमोल म्हामुणकर, निलांबरे घोलप आणि राधिका शिंदे उपस्थित होते. या महासत्संगास रोहयो मंत्री भरत गोगावले, मंत्री चंद्रकांत पाटील, तसेच डॉ. बाबासाहेब आंबेडकर तंत्रशास्त्र विद्यापीठ, लोणेरे येथील कुलगुरू कर्नल काळे उपस्थित राहणार आहेत.
हा महासत्संग आर्ट ऑफ लिव्हिंग महाराष्ट्र राज्य आणि महाड विभागाच्या संयुक्त विद्यमाने आयोजित करण्यात आला आहे. कार्यक्रमासाठी १३ शिक्षक व सुमारे ६० स्वयंसेवक सेवा देणार आहेत.
महासत्संगात ध्यान, सत्संग व सुदर्शन क्रियेच्या महत्त्वावर भर देण्यात येणार आहे. सुदर्शन क्रियेच्या माध्यमातून तणाव कमी होतो, मानसिक शांतता मिळते व जीवनात सकारात्मकता वाढण्यास मदत होते, असे आयोजकांकडून सांगण्यात आले.
हा महासत्संग सर्वांसाठी खुला असून, महाडसह कोकणातील व राज्यातील नागरिकांनी कुटुंबासह उपस्थित राहावे, असे आवाहन आयोजकांमार्फत करण्यात आले आहे.