शिवडी टीबी रुग्णालय बालरोगतज्ज्ञच्या शोधात

सकाळ वृत्तसेवा
मुंबई, ता. १४ : शिवडीच्या क्षयरोग रुग्णालयात तीन ते बारा वर्षे वयोगटातील मुलांसाठी लहान मुलांचा विभाग (पीडियाट्रिक वॉर्ड) तयार करण्यात आला आहे; मात्र बालरोगतज्ज्ञ (पिडियाट्रिशन) उपलब्ध होत नसल्याने हा वॉर्ड अद्याप सुरू झालेला नाही. चांगल्या दर्जाचे पिडियाट्रिशन आणि इतर चांगले डॉक्टर उपलब्ध व्हावेत यासाठी शिवडी टीबी रुग्णालयातर्फे वेगवेगळ्या विविध शक्कल सुचवल्या जात आहेत.
मुंबईबाहेरील नामवंत डॉक्टरांना ज्यांना मुंबईत स्थायिक व्हायचे आहे, त्यांना यापुढे पालिकेतर्फे निमंत्रित केले जाणार आहे. त्यासंदर्भातील प्रस्ताव तयार केला जाणार आहे. याबाबतीत पालिका प्रशासनाशी बैठक झाली असून अजून यावर विचारविनिमय सुरू असल्याचे शिवडी क्षयरोग रुग्णालयाच्या वरिष्ठांनी सांगितले. गेल्या सहा महिन्यांपासून यासाठी प्रयत्न केले जात आहेत. वारंवार जाहिराती प्रसिद्ध केल्यानंतरही या जाहिरातीला एकाही पिडियाट्रिशनने प्रतिसाद न दिल्याची खंत प्रशासनाकडून व्यक्त करण्यात आली आहे. दरम्यान, आता मुंबई किंवा मुंबईबाहेरून डॉक्टर मिळवण्यासाठी विविध कल्पनांचा वापर करण्यात येत आहे.
वसतिगृहाची सुविधा
३ ते १२ या वयोगटातील मुलांच्या उपचारांसाठीच्या वॉर्डचे जागतिक क्षयरोगाच्या दिनानिमित्त उद्‍घाटन करण्याची पालिकेची तयारी होती, पण लहान मुलांसाठी लागणारे बालरोगतज्ज्ञच अजूनपर्यंत पालिकेला उपलब्ध झाले नसल्याने फक्त मोठ्या मुलांवर उपचार केले जातात. डॉक्टरांना पालिकेच्या निवासी वसतिगृहात राहण्यासाठी जागा देण्याची कल्पना सुचवण्यात आली आहे. यासंदर्भात प्रस्ताव काढून आयुक्तांची मान्यता घेण्यात येणार असल्याची माहिती एका वरिष्ठ अधिकाऱ्याकडून देण्यात आली. इतर काही पर्याय या डॉक्टरांसाठी उपलब्ध करून देता येतील का, याबाबत विचारविनिमय सुरू आहे.