सावित्रीदेवी वसतीगृहाच्या वार्डनवर निलंबनाची कारवाई

मुंबई, ता. १६ : सावित्रीदेवी फुले शासकीय महिला वसतिगृहामध्ये मुलीची हत्या घडून दहा दिवसांचा कालावधी उलटल्यानंतर तेथील अधीक्षिका (वार्डन) यांच्यावर उच्च व तंत्रशिक्षणमंत्री चंद्रकांत पाटील यांनी आज निलंबनाची कारवाई करण्यात येत असल्याची घोषणा केली. या वसतिगृहात झालेल्या दुर्घटनेनंतर सावित्रीदेवी वसतिगृहातील घटनेची प्रशाकीय चौकशी करण्यासाठी रुसाचे प्रकल्प संचालक डॉ. निपुण विनायक आणि एसएनडीटीच्या कुलगुरू डॉ. उज्ज्वला चक्रदेव यांची समिती गठीत करण्यात आली होती, त्या समितीच्या प्राथमिक अहवालानुसार या वसतिगृहाच्या अधीक्षिकेचे निलंबन करण्यात येत असल्याचे पाटील यांनी सांगितले.

पहिल्या दिवसापासून विद्यार्थिनींच्या पालकांनी या प्रकरणी अधीक्षिकेवर कारवाई करण्याची मागणी केली हेाती. विभागाने नेमलेल्या समितीला अधीक्ष‍िका प्रा. वर्षा आंधळे अनेक प्रकारच्या दिरंगाईनंतर समोर आल्याने त्यांच्यावर आज निलंबनाची कारवाई करण्यात आली. दरम्यान, आज पाटील यांनी मृत विद्यार्थिनीच्या कुटुंबीयांची दादर येथील डॉ. बाबासाहेब आंबेडकर भवन येथे भेट घेतली. त्यांचे सांत्वन करून न्याय देण्याचे आश्वासन यावेळी त्यांनी दिले. यावेळी मंत्री पाटील यांनी कुबुंबीयांना तपासाची सविस्तर माहिती दिली. तसेच त्यांना मदत म्हणून पाच लाख रुपयांची आर्थिक मदत जाहीर केली. यावेळी रिपब्लिकन सेनेचे नेते आनंदराज आंबेडकर व विद्यार्थिनीचे नातेवाईक उपस्थित होते.