पायाभूत साक्षरता, संख्याज्ञानावर शिखर परिषद

मुंबई, ता. १६ : राज्यात शालेय शिक्षण, त्यातील पायाभूत साक्षरता आणि संख्याज्ञान (एफएलएन) या विषयावर १९ ते २२ जून या कालावधीत पुणे येथे जी-२० ही शिखर परिषद होणार आहे. यासाठी विविध राज्यांचे शिक्षण सचिव, प्रकल्प संचालक आदी शिक्षण क्षेत्रातील अधिकाऱ्यांची राष्ट्रीय स्तरावरील कार्यशाळा १७ ते १८ जून रोजी पुणे विद्यापीठात होणार असल्याची माहिती शालेय शिक्षणमंत्री दीपक केसरकर यांनी आज मंत्रालयात पत्रकार परिषदेत दिली. शिखर परिषदेच्या निमित्ताने सर्व विभागीय उपसंचालक स्तरावर २० जून रोजी रन ऑफ एज्युकेशनचे आयोजन केले जाणार असल्याचेही त्यांनी सांगितले. तसेच राज्यातील शिक्षकांच्या बदल्या यापुढे होणार नाहीत, असे धोरण आणले जाणार असल्याची माहिती केसरकर यांनी दिली.

-----
रन ऑफ एज्युकेशन रॅली
राज्यातील सर्व उपसंचालक विभागामध्ये २० जून रोजी रन ऑफ एज्युकेशन ही रॅली काढली जाणार आहे. त्यात प्रत्येक विभागामध्ये ५०० विद्यार्थी सहभागी होतील. या माध्यमातून पायाभूत साक्षरता, संख्याज्ञान याविषयी जनजागृती केली जाईल. पायाभूत साक्षरता आणि संख्याज्ञान या विषयावर विद्यार्थी संदेश देतील, विद्यार्थी जी-२० चा लागो परिधान करून या रन ऑफ एज्युकेशनमध्ये सहभागी होतील. विद्यार्थ्यांमध्ये गोडी निर्माण करण्यासाठी ही रॅली महत्त्वाची ठरणार आहे.

-----------------
दोन दिवसात संचमान्यता पूर्ण
राज्यातील शाळांमध्ये ३० हजार शिक्षकांची लवकरच भरती केली जाणार आहे. राज्यातील शाळांमध्ये ९० टक्के आधार कार्डचे व्हेरिफिकेशन पूर्ण झाले आहे. या व्हेरिफिकेशनमध्ये २५ हजार मुलांची संख्या कमी झाली आहे. काहींपैकी १० टक्के विद्यार्थ्यांच्या आधारकार्डची खात्री आम्ही करून घेत आहोत; मात्र सर्व १०० टक्के विद्यार्थ्यांच्या आधारचे व्हेरिफिकेशन आणि पुढील दोन दिवसांत संचमान्यता पूर्ण केली जाईल, अशी माहिती दीपक केसरकर यांनी दिली. संच मान्यता सुरू झाल्यानंतर सुरुवातीला जिल्हा परिषदेच्या शाळांतील शिक्षकांची भरती होईल. त्यासाठीच्या नेमणुका सीईओ करतील.