Organ Donation : मुंबईत अवयवदानाने तिघांना जीवदान

Organ Donation - के. जे. सोमय्या रुग्णालयात ५३ वर्षीय व्यक्तीच्या मृत्यूपश्चात झालेल्या अवयवदानामुळे तीन जणांना जीवदान मिळाले आहे. मुंबईत २५ वे यशस्वी अवयवदान पार पडले असून यंदा अवयवदान चळवळीला वेग आल्याचे चित्र आहे. रविवारी (ता. ९) सोमय्या रुग्णालयात प्रकृतीच्या अस्वास्थ्यामुळे एका ५३ वर्षीय व्यक्तीला दाखल करण्यात आले होते.

डॉक्टरांनी त्यांच्यावर उपचार केले, पण उपचारादरम्यान डॉक्टरांनी त्यांना मृत घोषित केले. डॉक्टरांनी त्यांच्या कुटुंबीयांना अवयवदानासाठी समुपदेशन केले. समुपदेशनानंतर नातेवाईकांनी या व्यक्तीचे अवयव दान करण्याचा निर्णय घेतला.

त्यानुसार या व्यक्तीच्या यकृत आणि दोन मूत्रपिंडांचे दान करण्यात आले. या दानामुळे तिघांना जीवनदान मिळाले आहे. हे अवयवदान झेडटीसीसीच्या मार्गदर्शक सूचनांनुसार केले गेले असल्याचे समन्वयकांनी सांगितले.