वैद्यकीयचे‍ शिक्षण घेणारे विद्यार्थी शिष्यवृत्तीपासून वंचित

मुंबई, ता. २६ : मुंबई महापालिकेच्या हिंदुहृदयसम्राट बाळासाहेब ठाकरे वैद्यकीय महाविद्यालयातील २०१९-२० मधील एमबीबीएसच्या मागास व आर्थिक मागास आदी प्रवर्गातील सुमारे ७८ विद्यार्थी शिष्यवृत्तीपासून वंचित राहिले आहेत. या विद्यार्थ्यांच्या शिष्यवृत्तीसाठी सामाजिक न्याय विभागाने आदेश द्यावेत, अशी मागणी माजी सिनेट सदस्य ॲड. वैभव थोरात, शिवसेनेचे सिद्धेश कदम यांनी केली आहे. ज्या विद्यार्थ्यांना शिष्यवृत्ती मिळाली नाही, त्यांना महाविद्यालयांकडून शुल्क भरण्यासाठी नोटिसा बजावल्या जात असल्याने हा प्रश्न सोडवण्यासाठी खासदार श्रीकांत शिंदे यांनीही पुढाकार घेण्याची मागणी माजी सिनेट सदस्य ॲड. थोरात यांनी केली आहे. हिंदुहृदयसम्राट बाळासाहेब ठाकरे वैद्यकीय महाविद्यालयामध्ये २०१९-२० मध्ये एमबीबीएसच्या दुसऱ्या वर्षात शिक्षण घेत असलेल्या विद्यार्थ्यांना शुल्क भरण्यासंदर्भात महाविद्यालय प्रशासनाकडून दोनदा मुदत देण्यात आली होती; मात्र त्या मुदतीत त्यांना अर्ज करता आला नसल्याने ते शिष्यवृत्तीपासून वंचित राहिल्याचा आरोप करण्यात आला आहे.