मनसेची ‘खड्डे भ्रष्टाचाराचे अड्डे’ मोहीम

मुंबई, ता. ३१ : राज्यातील आमदार फुटीप्रकरणावर मनसेने ‘एक सही संतापाची’ या नावाने मोहीम सुरू करून सरकारवर टीका केली होती. त्यानंतर आता मनसेने आपला मोर्चा खड्ड्यांकडे वळवला आहे. ‘खड्डे भ्रष्टाचाराचे अड्डे’ या ‘हॅशटॅग’खाली मनसेने मोहीम सुरू करत खड्ड्यांचे फोटो पाठवण्याचे आवाहन नागरिकांना केले आहे. खड्ड्यांविरोधात आक्रमक झालेल्या मनसेने ठिकठिकाणी आंदोलनेही केली. त्यानंतर समाजमाध्यमाद्वारे त्यांनी आपली भूमिका आक्रमक केली आहे. तुमच्या शहरातील खड्ड्यांचे फोटो टिपा आणि #खड्डे_भ्रष्टाचाराचे_अड्डे हा हॅशटॅग आणि शहराच्या नावासह मनसेच्या ट्विटर अकाऊंटला टॅग करा किंवा समाज माध्यमावर अपलोड करा. शासन-प्रशासनासह सर्वांचा हा भ्रष्ट कारभार चव्हाट्यावर आणू या. आपला महाराष्ट्र कसा खड्ड्यात घातला जातोय, हे लोकांपर्यंत पोहोचवण्यासाठी मोहिमेत सहभागी व्हा, असे आवाहनही मनसेने केले आहे.