‘सखी सावित्री’ समिती एका महिन्यात गठित करा

सकाळ वृत्तसेवा

मुंबई, ता. ३ : राज्यातील सर्व शाळांमध्ये मुला-मुलींच्या सुरक्षिततेसाठी व निकोप आणि समतामुलक वातावरण निर्मितीसाठी ‘सखी सावित्री’ समिती गठन करण्याचे आदेश सरकारने दिले आहेत. पुढील एका महिन्यात सर्व शाळांमध्ये या समित्यांचे गठन करावे, असे निर्देश शालेय शिक्षणमंत्री दीपक केसरकर यांनी दिले.

राज्य बाल हक्क आयोगाच्या अध्यक्ष सुशीबेन शाह यांनी मंत्री केसरकर यांची भेट घेतली. यावेळी प्रधान सचिव रणजित सिंह देओल (ऑनलाईन), प्राथमिक शिक्षण संचालक शरद गोसावी, मुंबई विभागीय उपसंचालक संदीप संगवे यांच्यासह सर्व विभागीय शिक्षण उपसंचालक (ऑनलाईन) आदी उपस्थित होते. मंत्री केसरकर म्हणाले, विद्यार्थ्यांच्या शिक्षणाला सरकारचे सर्वोच्च प्राधान्य आहे. याचबरोबर त्यांची सुरक्षा, शाळेमधील पोषक वातावरण, विद्यार्थ्यांच्या हक्कांचे संरक्षण, त्यांचे समुपदेशन आदींसाठी सरकारने शाळा, केंद्र, तालुका अशा विविध पातळ्यांवर ‘सखी सावित्री समिती’ गठन करण्याबाबत १० मार्च २०२२ रोजी परिपत्रक जारी केले आहे. त्याची तातडीने अमलबजावणी करून जेथे समिती कार्यरत नसेल तेथे एका महिन्यात समिती गठन करण्याचे निर्देश दिले. त्याचप्रमाणे पालकांमध्येही याबाबत जागृती करावी, असे त्यांनी सांगितले.