मंत्रालयात महिला बचत गटांचे प्रदर्शन व विक्री

मुंबई ता. १० : महिला आर्थिक विकास महामंडळामार्फत मंत्रालयात दिवाळीनिमित्त विविध उत्पादनांच्या प्रदर्शन आणि विक्रीचे आयोजन करण्यात आले. याद्वारे महिला बचत गटांनी सुमारे चार लाख रुपयांच्या वस्तूंची विक्री केली. महिला बालविकास विभागाचे सचिव डॉ. अनुपकुमार यादव, अल्पसंख्याक विभागाच्या सचिव आय. ए. कुंदन, माविमच्या व्यवस्थापकीय संचालक डॉ. इंदू जाखड यांनी उत्कृष्ट कामगिरीसाठी महिलांना प्रशस्तिपत्रक प्रदान करून अभिनंदन केले. मंत्रालयातील अधिकारी व कर्मचाऱ्यांसाठी आयोजित पणती सजावट स्पर्धेस उत्कृष्ट प्रतिसाद मिळाला.
ठाणे, मुंबई, पुणे, नंदूरबार, जालना, चंद्रपूर, स्वाभिमान प्रकल्प (मालाड) येथून आलेल्या महिला बचत गटांचा यात समावेश आहे. १० स्टॉल असून २० महिलांचा यामध्ये सहभाग आहे. मंत्रालयातील पणती सजावट स्पर्धेतील विजेत्यांना वस्तू खरेदीत २० टक्के सूट देण्यात आली असल्याची माहिती महिला आर्थिक विकास महामंडळाने दिली. महिला बचत गटांनी तयार केलेल्या दिवाळी फराळ, सेंद्रिय शेतमाल उत्पादनांचा स्टॉल, हस्तकला तोरण, लेदर वर्क, महिलांची सौंदर्यप्रसाधने या वस्तूंचे प्रदर्शन लावण्यात आले होते.