आयआयटी मुंबईत सेमीकंडक्टर तंत्रज्ञानाचे केंद्र सुरू

मुंबई, ता. २८ : आयआयटी मुंबईत पहिल्या ‘सेमीएक्स’ परिषदेला सुरुवात झाली असून ही परिषद २९ नोव्हेंबरपर्यंत सुरू राहणार आहे. या परिषदेत आयआयटी मुंबईमध्ये सेमीएक्स सेंटर फॉर सेमीकंडक्टर टेक्नॉलॉजी यांच्या वतीने सेमीकंडक्टर तंत्रज्ञानाचे केंद्र सुरू करण्यात आले आहे. याचे उद्‍घाटन केंद्रीय इलेक्ट्रॉनिक्स आणि माहिती तंत्रज्ञान सचिव, एस. कृष्णन आणि आयआयटी मुंबईच्या शैक्षणिक आणि पायाभूत सुविधा विभागाचे उपसंचालक प्रा. एस. सुदर्शन, प्रा. उदयन गांगुली आदी मान्यवरांच्या उपस्थितीत झाले. या परिषदेत शैक्षणिक विषय, भारतीय सेमीकंडक्टर ग्राहक आणि निर्माते, शैक्षणिक आणि गुंतवणूकदार, सरकारी उद्योजक, गुंतवणूकदार, नीती रचनाकार तसेच अनेक उद्योजक सामील झाले आहेत. या परिषदेचे प्रमुख पाहुणे एस. कृष्णन म्हणाले, ‘शैक्षणिक, उद्योग आणि सरकार यांच्यातील सहकार्यासाठी ‘सेमीएक्स’मध्ये जे प्रयत्न केले जात आहेत ते देशातील इतर शैक्षणिक संस्थांमध्येही वाढावेत अशी आमची इच्छा आहे. आम्ही एका ऐतिहासिक उंबरठ्यावर आहोत. हा उपक्रम भारतातील उर्वरित सेमीकंडक्टर उद्योगासह वाढेल.’