तापमानाची धग कायम

तापमानाची धग कायम
कर्जतमध्ये ४४.१ अंशांवर, उष्णतेच्या लाटेचा इशारा कायम
सकाळ वृत्तसेवा
मुंबई, ता. २९ : एमएमआर परिसरातील तापमानाची धग सोमवारीही कायम राहिली. कर्जतमध्ये सर्वाधिक ४४.१ अंश कमाल तापमान नोंदवले गेले. ठाणे ४१.२, धसई ४२.४, नवी मुंबई ४१.१, पालघर ४१, विरार ४०.५ आणि अलिबाग येथे ३५.२ कमाल तापमानाची नोंद झाली. मुंबई शहर आणि उपनगरातील तापमानात एका अंशाची वाढ होऊन ते चाळिशीच्या आणखी जवळ पोहोचले. आर्द्रतेमध्ये मोठ्या प्रमाणात घट झाल्याने उन्हाची तीव्रता तितकीशी जाणवत नव्‍हती. दरम्यान, शहर आणि उपनगरातील उष्णतेच्या लाटेचा इशारा हवामान विभागाने कायम ठेवला आहे.
सांताक्रूझमध्ये कमाल ३९.१ आणि किमान २७, तर कुलाबा येथे कमाल ३५.२ आणि किमान २५ अंश तापमानाची नोंद झाली. रविवारच्या तुलनेत कमाल तापमानात साधारणत: एक अंशाने वाढ झाली आहे. हवामान खात्याने मुंबईतील तापमानात साधारणता ३० एप्रिलपर्यंत वाढ होणार असल्याचा अंदाज वर्तवला आहे.
मंगळवारी शहर आणि उपनगरात आकाश मुख्यता निरभ्र राहील. शहर आणि उपनगरात काही ठिकाणी उष्णतेची लाट निर्माण होण्याची शक्यता आहे. कमाल आणि किमान तापमान अनुक्रमे ३८ आणि २६ अंश सेल्सिअस राहण्याची शक्यता आहे. त्यानंतर तापमानात काही अंशी घट होण्याचा अंदाज आहे.
----
मुंबईत आर्द्रता घटली
शहरातील आर्द्रतेत कमालीची घट झाली आहे. कालच्या ५२ टक्क्यांच्या तुलनेत बोरिवलीची आर्द्रता ३२ टक्के आहे. सांताक्रूझ येथील आर्द्रता ४० टक्क्यांच्या खाली, ठाणे ३० टक्क्यांच्या खाली आहे. उष्णतेची कोरडी लाट दिसली. १५-१७ एप्रिलला आलेल्या उष्णतेच्या लाटेच्या तुलनेत या वेळी हवामान जास्त दमट जाणवले नाही. यामुळे लोकांना याचा फारसा त्रास झाला नाही.